Taldyqorǵandyq analar qoǵamdyq kólikte tegin júre bastady

TALDYQORǴAN. QazAqparat - Taldyqorǵandyq kópbalaly analarǵa birinshi sáýirden bastap qoǵamdyq kólikte júrý tegin. Búgingi kúnge deıin 700-den astam ana avtobýsta tegin júrý bıletterin alyp úlgerdi, dep habarlaıdy QazAqparat tilshisi.

«Almaty oblysynyń ortalyǵynda 4 jáne odan da kóp balasy bar 2500-ge jýyq ana tirkelgen. Taldyqorǵandyq jolaýshylardy tasymaldaýshy kompanııalar óńir basshylarynyń kópbalaly otbasylarǵa qamqorlyq jasaý týraly úndeýlerin qoldap analardy tegin tasymaldaı bastady. aldaǵy ýaqytta bul shyǵyndar jergilikti bıýdjetten qarastyrylatyn bolady»,- dep atap ótti qala ákimdiginiń baspasóz hatshysy Danııar Janys.

Jalpy Jetisýdyń bas shaharynda qazirgi tańda oqýshylar men stýdentter, zeınetkerler tegin tasymaldanady. Olardyń qataryn ardaqty analar eseledi.

Aldaǵy ýaqytta jergilikti bılik qala joldaryna mýnıtsıpaldy avtobýstar shyǵarý máselesin de qarastyrmaq.