Taldyqorǵandaǵy jobalaý ınstıtýtyna Júsip Jánekenovtiń esimi berildi
TALDYQORǴAN. QazAqparat - Taldyqorǵandaǵy «Qazgıdrovodhoz» ınstıtýtynyń Almaty oblysyndaǵy fılıaly budan bylaı Júsip Jánekenovtiń atymen atalady. Osy mekemede J. Jánekenov 40 jyldan astam eńbek etken edi, dep habarlaıdy QazAqparat tilshisi.
Jetisý ólkesindegi sý sharýashylyǵynyń damýyna ólsheýsiz eńbek sińirgen azamattyń tas músini osy mekeme aldyna ornatyldy. J. Jánekenov kózi tiri bolǵanda bıyl 70 jasqa tolar edi. Sharaǵa bilikti mamannyń týǵan-týystary, dos-jarandary qatysty. Sóz sóılegender elge jasaǵan eńbegin eske alyp, azamattyq ustanymyna baǵa berdi.
Júsip Rysqalıuly Batys Qazaqstan oblysynda týǵanymen búkil kúsh-jigerin Jetisýdyń sý sharýashylyǵy qurylystary men ǵımarattaryn jobalaý jumysyna arnady. Máselen, onyń tikeleı basqarýymen burynǵy Taldyqorǵan oblysy boıynsha 1990 jyly 303 myń gektar sýarmaly jer ıgerildi. Eldi mekenderge 5 myń shaqyrym aýyzsý júıesi tartyldy. «Qundyzdy», «Kóltaban», «Qyzylaǵash», «Qońyr óleń» aýyldarynda jaýyndatqysh arqyly jer astynan sý shyǵaryp, egistik salǵan Júsip Jánekenov bolatyn dep eske aldy jınalǵandar.
