Taldyqorǵandaǵy jappaı tártipsizdik kezinde Kerbulaq aýdanynyń 6 turǵyny qarý urlaǵan

TALDYQORǴAN. QazAqparat- Almaty oblysyndaǵy Kerbulaq aýdanynyń turǵyndary qańtar aıynyń basynda Taldyqorǵan qalasynda oryn alǵan jappaı tártipsizdikke qatysty degen kúdikpen ustalyp, ýaqytsha qamaqqa alyndy, - dep habarlaıdy QazAqparat tilshisi.

«Jedel izdestirý sharalary barysynda qylmysqa qatysy bar degen kúdikpen 1989 jyly týǵan turǵyn ustaldy. Tártip saqshylary keltirgen aıǵaqtardan keıin ol tártipsizdik kezinde zańsyz alyp ketken qarý jaraqtaryn qaıtaryp, sybaılastarynyń jeke tulǵalaryn aıqyndap berdi»,- dedi Kerbulaq aýdany PB bastyǵynyń orynbasary polıtsııa maıory Almas Bekıev.

Ustalǵan turǵynnyń aıtýynsha, ol tanystarymen birge Taldyqorǵan qalasyndaǵy beıbit sherýge qatysýǵa barǵan. Sol túni bolǵan jappaı tártipsizdik kezinde kúdiktiler belgisiz adamdardan Kalashnıkov avtomatyn, Makarov tapanshasyn jáne olardyń oq-dárilerin alyp, kólikterine salyp qoıǵan. Sonymen qatar, olar mekemelerdiń birinen avtokóliktiń 4 dana dóńgelegin oljalaǵan. Zańsyz tapqan dúnıelerin sybaılastar ózara bólisip alǵan.

«Atalǵan derek boıynsha QR Qylmystyq kodeksiniń 287-babyna sáıkes sotqa deıingi tergeý amaldary júrgizilýde. 6 turǵyn qylmysqa qatysy bar degen kúdikpen ýaqytsha ustaý ızolıatoryna qamaqqa alyndy. Olardan tártip saqshylardan qoldy bolǵan avtomat pen tapanshalar, olardyń oq-dárileri, kólik dóńgelekteri tárkilenip, is materıaldaryna aıǵaqzat retinde tirkeldi»,- dep tolyqtyrdy polıtsııa maıory Almas Bekıev.

Tártip saqshylary tergeý barysynda kúdiktilerdiń áreketterin jáne olardyń osyǵan uqsas basqa da qylmystarǵa qatysy baryn anyqtaıtyn bolady. Sonymen qatar, olar qandaı maqsatta atys qarýlary men oq-dárilerin ıemdenip, alyp ketkenin tekseredi.