Taldyqorǵandaǵy jańa kottedjdi qalashyqta úılerdiń qabyrǵasy jarylýda
TALDYQORǴAN. QazAqparat - Taldyqorǵan qalasynda 2015 jyldyń qarasha aıynda qoldanysqa berilgen kottedjdi qalashyqtyń turǵyndary baspanalardyń sapasy syn kótermeıtinin aıtýda. Sózderinshe, 45 páterli 5 úıdiń qabyrǵalary jarylyp, sylaqtary túsip jatyr, dep habarlaıdy QazAqparat tilshisi.
Máselen, Erlan Amanbaev úıine jóndeý júrgizý úshin eski túsqaǵazdardy syryp jatqanda eki qabyrǵanyń túıisken buryshy ajyrap qalǵanyn baıqaǵan. Páterin 2017 jyldyń qańtarynda 20 jylǵa ıpotekalyq nesıemen alǵan ol, eger jer silkinse bul qabyrǵa ábden qulap ketýi múmkindigin aıtady. Qazir ol kommýnaldyq qyzmetti qospaǵanda páterine aı saıyn 60 myń teńge tólep jatyr.
Munda turyp jatqandar kottedjdi qalashyqtaǵy 45 páterdiń de jaǵdaıy osyǵan uqsas ekendigin aıtýda. Sylaqtary túsýde, tóbesinen sý aǵyp, qabyrǵalary kógerýde. Al qysta jaǵdaı tipti qıyn. Úı jylymaıdy, ystyq sý múldem joq. Turǵyndar óz kúshterimen sý jylytatyn qondyrǵylardy ornatyp alǵan. Bul qalashyqtyń turǵyzylýyna tapsyrys bergen - «Jetisý» áleýmettik kásipkerlik korporatsııasy. Merdigerdi ashyq baıqaý ótkizý arqyly iriktegen. Al Korporatsııa ókilderi turǵyn úıdi qabyldap alǵanda ol barlyq talapqa saı bolǵanyn alǵa tartady.
Infraqurylymdyq jobalar departamentiniń dırektory Abzal Erjomartovtyń aıtýynsha, qurylys jumystaryn Kókshetaý qalasynyń merdiger mekemesi jeńip alǵan. Qazirgi tańda qurylys kompanııasy ókilderin Taldyqorǵanǵa shaqyrtý máselesi qarastyrylyp jatyr.
Kottedjdi qalashyq turǵyndarynyń qurylys sapasynan basqa da máseleleri jeterlik. Olar úshin qalaǵa jetý óte úlken problema. Qalashyq Almaty-Taldyqorǵan tas joly boıynda ornalasqan. Jol boıynda jaıaý júrginshilerge arnalǵan eshqandaı ótkel joq. Turǵyndar aǵylyp jatqan kólikterden jáne eki joldy bóletin qorshaýdan sekirip attap, qarsy betke ótetinderin aıtady.
Olardyń sózinshe, jergilikti bılik bul máseleden qulaǵdar bolsa da eshbir áreket jasamaıdy.
