Taldyqorǵandaǵy jalpyqalalyq senbilikke 6 myńdaı turǵyn qatysty

TALDYQORǴAN. QazAqparat – Jetisý oblysyndaǵy eldi mekenderdi sanıtarlyq tazalaý, abattandyrý jáne kógaldandyrý aılyǵynyń aıasynda Taldyqorǵanda jalpyqalalyq senbilik ótkizildi. Bul týraly QazAqparat Jetisý oblysy ákiminiń baspasóz qyzmetine silteme jasap habarlaıdy.

Tazalyq jáne kógaldandyrý jumystaryna 6 myńǵa jýyq adam, kommýnaldyq mekemelerdiń 50 tehnıkasy tartyldy. Qaladaǵy ár mekemeniń eńbek ujymdary ózine qarasty aýmaqtarǵa tazalaý jumystaryn júrgizdi. Qoqystar jınalyp, aryqtar tazalandy. Osy kúni jalpy kólemi 900 tekshe metrge jýyq qoqys jınalyp, shyǵaryldy.

Oblys basshysy Beıbit Isabaev, óńirdegi ardagerler, úkimettik emes uıymdar ókilderi, eriktiler, múmkindigi shekteýli jandar, jastar uıymdary «Jeńis» saıabaǵyna myńnan astam qylqan japyraqty aǵash otyrǵyzdy.

«Mundaı sharalar jıi ótkizilýi kerek. Jastar aınalany taza ustaýǵa, qorshaǵan ortaǵa qamqorlyq jasaýǵa úırenedi. Búgin biz, ardagerler senbilikke óz úlesimizdi qosyp, aǵash ektik. Endi osy aǵashtardy kúndelikti sýǵaryp, kútip-baptap otyrsa, qalamyz burynǵydan da kórkeıe túsedi dep oılaımyn. Qalany kógaldandyrý, abattandyrý, tazalaý – turǵyndardyń ortaq mindeti», - deıdi Jetisý oblystyq «Semeı polıgony» qoǵamdyq birlestiginiń tóraǵasy, ardager Tolybek Danabekov.

Bıyl Jetisý oblysynda jalpy sany 93 myńnan astam kóshet otyrǵyzý josparlanǵan, sonyń 2 myńdaıy búginge deıin «Jeńis» saıabaǵyna otyrǵyzyldy.