Taldyqorǵandaǵy saıajaıdy sý basty
TALDYQORǴAN. QazAqparat - Taldyqorǵan qalasyndaǵy «Qyzyl tas» saıajaıyn sý basty, dep habarlaıdy QazAqparat tilshisi.
Taýda erigen qar sýy eteginde ornalasqan turǵyn úılerge jetip, aýlalaryna kirgen. Birneshe saıajaı ýchaskesi sý ortasynda qalǵan. Tótenshe jaǵdaı ýaqtyly habarlanǵannyń arqasynda sýdy qaıtarýǵa múmkindik týdy. Al qyzyl sýdyń jaıylýyna sýaǵarlar men kanaldardyń kúl-qoqysqa tolyp, aryqtardyń tazalanbaýy sebep bolǵan. Qazirgi tańda oqıǵa ornynda 50-ge jýyq adam men 10 shaqty tehnıka jumys istep jatyr. Shyǵyn kólemi anyqtalýda.
«Sý meniń úıime taıaý qaldy. Keıbir kórshiler ketip bara jatyp osy aryq boıynda qoldaryndaǵy qoqysty tastap ketedi. Sonyń kesirinen aryq bitelip, sý jaıylyp ketti», - deıdi saıajaı turǵyny Qanat Áskerbekuly.
Saıajaıǵa tap bergen sýdyń betin qaıtarý úshin qala ákimdigi shuǵyl sharalardy qolǵa alyp, kommýnaldyq mekemelerdiń tehnıkalaryn jumyldyrdy. Sonymen qatar, erigen qar sýy azaımaıynsha kezekshilik júrgiziletindigin málimdedi.
«Saıajaıdaǵy barlyq aryq júıeleri qadaǵalaýǵa alyndy. Ásirese kópirler basty nazarda. Arnaıy tehnıkalar aryqty bitegen qoqysty shyǵaryp, sýdyń aǵyp ketýin qamtamasyz etýde», - dedi Taldyqorǵan qalasy ákiminiń baspasóz hatshysy Danııar Janys. Sondaı-aq, ol saıajaıda táýlik boıy kezekshilik qurylyp, jaǵdaı baqylaýǵa alynatynyn jetkizdi.
