Taldyqorǵandaǵy saltanatty sherýge 2,5 myńnan asa bala qatysty
TALDYQORǴAN.QazAqparat - Taldyqorǵanda tuńǵysh ret eki jarym myńnan astam balanyń qatysýymen saltanatty sherý ótti. Merekelik naqyshta kıingen balalardyń merekelik sharasy Oqýshylar saraıynyń mańynan bastaý alyp, Balapanov kóshesiniń boıynda jalǵasty, dep habarlaıdy QazAqparat tilshisi.
Júzderi balbul jaınaǵan jas jetkinshekterdiń qýanyshynda shek joq. Tól merekelerin aıqyn sezinse kerek qadamdaryn nyq basyp, merekelik sherýdiń kórkin qyzdyra tústi. Úrmeli aspaptyń yrǵaǵyna erip, daýylpazdaryn asynyp bara jatqan balalarǵa úlkender de dán rıza. Balalar sherýi Jastar mádenı demalys saıabaǵynda merekelik kontserpen jalǵasty. Saltanatty sharada qala ákimi Baǵdat Qarasaev sóz alyp, aıtýly merekege oraı óziniń jyly lebizin bildirdi.
"Qurmetti balalar, ata-analar jáne qala qonaqtary! Barshańyzdy 1-maýsym - Halyqaralyq balalardy qorǵaý kúnimen shyn júrekten quttyqtaımyn! Búginde Elbasynyń salıqaly saıasatynyń arqasynda memleketimizde balalardyń alańsyz bilim alýyna, baqytty balalyq kezeńin qyzyqty da, maǵynaly ótkizýine barlyq jaǵdaı jasalǵan. Taldyqorǵanda sońǵy bes jylda jylyna ortasha eseppen tórt myńdaı sábı ómirge kelgen. Al, bıylǵy jyldyń tórt aıynda ǵana 1293 náreste dúnıe esigin ashty. Qazir 6 jasqa deıingi taldyqorǵandyqtardyń sany 25 myńnan asyp, barlyq turǵyndardyń 15 paıyzyn qurap otyr. Osy sábıler erteń azamat bolyp, memlekettiń tiregine aınalady dep senemin. Bul saltanatty sherý jas urpaqtyń keleshekke senimmen qadam basýyna jol ashady dep oılaımyn.Árbir otbasy tárbıeli, bilimdi azamat ósirip, tútinimizdiń túzý shyǵýyna óziniń úlesin qosýy kerek, sonda ǵana Máńgilik Eldiń irgetasy berik bolmaq. Árbir otbasynda bala sany artyp, elimizdiń tuǵyryn bıik ustaıtyn búldirshinderimiz óse bersin", - dedi B. Qarasaev.
Aıta keteıik, sherýge Oqýshylar saraıynyń, N.Tilendıev atyndaǵy balalar mýzyka mektebiniń jáne Q.Baıseıitov atyndaǵy saz kolledji syndy bilim mekemeleriniń oqýshylary qatysty. Olar sherý barysynda án aıtyp, bı bılep túrli baǵytta óz ónerlerin pash etti. Bul respýblıka kóleminde alǵash ret uıymdastyrylyp otyrǵan aýqymdy shara.
