Taldyqorǵandaǵy Prezıdent shyrshasy jańa ǵımaratta ótti
TALDYQORǴAN. QazAqparat - Taldyqorǵanda ótken Prezıdent shyrshasyna 16 aýdan men 3 qaladan 200-den astam jas óren keldi. Saltanatty shara jýyrda ashylǵan Kórme kesheninde ótti, dep habarlaıdy QazAqparat tilshisi.
Búldirshinderdiń jańajyldyq keshinde olarǵa qoıylǵan bir ǵana talap boldy. Jańajyldyq kıim kıip kelip, kóterińki kóńilmen, oınap-kúlip qaıtý. Bári sol talaptan shyǵýǵa tyrysyp baqty. Jasyl shyrsha janynda kózdiń jaýyn alatyn alýan túrli keıipkerler. Al olardyń júzderinde baqytty balalyq shaqtyń ystyq lebi. Solardyń qatarynda Jarkent qalasynan kelgen Ákejan Seıitqalı da bar. Ol shyrshaǵa erekshe kostıým kıip keldi. Merekelik kıimine Elbasynyń «Bolashaqqa baǵdar: Rýhanı jańǵyrý» maqalasynyń tańbasyna aınalǵan túrli-tústi qyran kostıýmin anasyna tiktirgen.
Mektepte ozat, qoǵamdyq jumystarda belsendi oqýshy Prezıdentke sheksiz alǵys aıtýda. Balalardy bir qýantyp, shattyǵyn eselegen Elbasynyń bul tartýyn Ákejan endi eshqashan umytpaıdy. Bıylǵy mereke óte joǵary deńgeıde ótti. Ertegi men mýltfılm keıipkerleri balalardyń qasynda bolyp, tamasha qoıylymdar kórsetti.
Shalǵaı aýyldan kelgen balalar Aıaz ata men Aqshaqarǵa óz ónerinen shashý shashyp, qýanyshty eseledi. Shyrshaǵa kelgen árbir balaǵa óńir basshysy Amandyq Batalov qystyq kıim men oqýǵa qajet qural-jabdyqtar tartý etti. Mereke sońynda bári estelik sýretke túsip, balalarǵa jaıylǵan tátti dastarhannan dám tatty.
