Taldyqorǵandaǵy oıyn-saýyq keshenderi jappaı tekseriledi
TALDYQORǴAN.QazAqparat - Taldyqorǵandaǵy oıyn-saýyq keshenderi jappaı tekseriletin boldy. Buǵan jýyrda qaladaǵy kóńil kóterý oryndarynyń birinde bolǵan atystan turǵyndardyń narazylyǵy sebep, dep habarlaıdy QazAqparat tilshisi.
Shahar bıligi oıyn-saýyq ortalyqtarynyń arnaıy tizimin jasap, el-jurttyń pikirine qulaq túrmek. Sol arqyly turǵyndardyń mazasyn qashyryp, shekten shyqqan bıznes nysandaryna shara qoldanbaq. Osyǵan oraı oblystyq kásipkerlik palatasy jurttyń mazasyn qashyrǵan nysan ıelerine toqtaý salatyn jańa jobany qolǵa almaq.
«Oblystyq kásipkerler palatasy arnaıy etıkalyq kodeks ázirlep jatyr. Qujatty daıyndaý barysynda kóńil kóterý oryndarynyń ıelerimen de kelisimge kelmekpiz. Eger olar qujatta kórsetilgen talapty eskermeı, qala tynyshtyǵyn saqtaýǵa nemquraılyq tanytsa palata tarapynan kórsetiletin qoldaýlardan aıyrylady», dedi oblystyq kásipkerler palatasynyń zańgeri Banııamın Faızýlın.
Al qala bıligi endi tártipke moıynsunbaıtyn oıyn-saýyq oryndarymen kúresti kúsheıtpekshi. Ol úshin kópqabatty úılerdiń mańyndaǵy túngi klýb, meıramhana,dámhanalarǵa jaqyn turatyn jurtpen júzdesip, pikirlerin tyńdap "qara tizim" jasamaq.
«Munyń bári qalalyq ákimdiktiń baqylaýynda. Kópqabatty úılerdiń jertólesinde jáne bólek turǵan kóńil kóterý oryndarynyń tizimi jasalyp jatyr. Osy tizim boıynsha qaı oıyn-saýyq keshenderine shaǵym eń kóp tústi, narazylyq basym, sol esepke alynady. Ary qaraı jaýapqa tartý sııaqty tıisti sharalar qabyldanatyn bolady», - dedi Taldyqorǵan qalasy ákiminiń baspasóz hatshysy Danııar Janys.
Shahardyń tynyshtyǵyn buzǵan "tártipsiz" kóńil-kóterý oryndaryna aldymen qatań eskertý berilýi múmkin. Odan nátıje shyqpasa qyzmetin toqtatý da josparlanyp otyr.
Esterińizge sala keteıik, tamyzdyń 10-nan 11-ne qaraǵan túni Taldyqorǵandaǵy oıyn-saýyq kesheniń mańynda oq atylyp, bolǵan jaǵdaıdy kýágerlerdiń biri vıdeoǵa túsirip alǵan. Artynsha beınejazba áleýmettik jeli arqyly taralyp, halyqtyń narazalyǵyn týdyrdy. Beınejazbaǵa túsirip turǵan turǵyn «Statýs» oıyn-saýyq kesheniniń mańynda turatyn jandarǵa demalys kúnderi maza joq ekenin aıtady. Sonymen birge, vıdeoda oqtyń birneshe ret atylǵan daýysy jáne birneshe adamdardyń bir-birimen aıqaılasyp jatqandyǵy estiledi.
