Taldyqorǵandaǵy qurylysy aıaqtalmaǵan qonaq úı jataqhanaǵa aınalady

TALDYQORǴAN. QazAqparat - Taldyqorǵandaǵy qurylysy aıaqtalmaǵan kópqabatty qonaq úı 280 oryndyq stýdentter jataqhanasyna aınalady. Ǵımarat arnaıy saraptamadan ótip, jobalyq-smetalyq qujaty taǵaıyndaldy, dep habarlaıdy QazAqparat tilshisi.

2020 jylǵa deıin Almaty oblysynda 2 000 stýdentke arnalǵan 10 shaqty jataqhana salynady. Qazirgi tańda 1 ýnıversıtet pen 8 kolledj stýdentterine baspana qajet. Olqylyqtyń ornyn toltyrý maqsatynda 7 oqý ornyna arnalǵan jataqhanalardyń jobalyq-smetalyq qujaty daıyndaldy. Bir jataqhana kúrdeli jóndeýden ótedi. Sondaı-aq stýdentter baspanasynyń qurylysy aıaqtalǵansha olardy jatyn oryndarymen qamtamasyz etý maqsatynda qosymsha ǵımarattar satyp alý qarastyrylǵan.

«Jataqhana qurylysy bastalyp, ary qaraı aıaqtalǵansha kútip turmaımyz ǵoı. Sol úshin oblys ákimi arnaıy tapsyrma berdi. Daıyn turǵan ǵımarattardy satyp alý arqyly jastarǵa jaǵdaı jasalady. Nysandardy jataqhanaǵa aınaldyrý maqsatynda jol kartasy ázirlendi», - deıdi Almaty oblystyq bilim basqarmasy basshysynyń orynbasary Gúlsara Isaǵulova.

Al Taldyqorǵandaǵy І. Jansúgirov atyndaǵy Jetisý memlekettik ýnıversıteti óz qarjysyna 250 oryndyq zamanaýı eki jataqhananyń jobasyn ázirlep qoıdy. Ámbebap stýdentter ú ıinde ár bólmede óz as úıi, jýynatyn bólmesi bolyp, barlyq qajet jıhaz jáne turmystyq tehnıkamen qamtylatyn bolady.

Oqý ornynyń tárbıe jumysy jáne áleýmettik máseleler jónindegi prorektordyń aıtýynsha bıyl ýnıversıtet janynan kolledj ashyldy. Demek stýdentter sany artyp, jataqhana oryndaryna suranys artady. Qazir jataqhana salynatyn jer anyqtalyp, barlyq qujattar daıyndaldy. Jańa tıptegi jataqhanalarda bir bólmede eki stýdentten ornalasatyn bolady.