Taldyqorǵandaǵy «Kórkemsýret galereıasy» avtokólik jeńip aldy
TALDYQORǴAN. QazAqparat - Taldyqorǵandaǵy Kórkemsýret galereıasy "Úzdik oblystyq mádenıet mekemesi" atandy. Ujymǵa sý jańa "Lada Largus" markaly avtokólik tartý etildi. Jetisý tórinde ótken mádenıet jáne óner qyzmetkerleriniń kásibı merekesinde ózge de 7 atalym boıynsha úzdik dep tanylǵandar arnaıy dıplomdar men 100 myń teńgeniń sertıfıkatyn ıelendi, dep habarlaıdy QazAqparat tilshisi.
Atap aıtqanda Qapshaǵaı qalalyq kitaphanasy, B. Rımova atyndaǵy oblystyq drama teatrynyń ártisi Sandýǵash Muńaıtbasova, Qaratal aýdanyndaǵy «Altynaı» bı ansambli, Tekeli qalalyq mádenıet úıi jáne basqa da ujymdar úzdikter qatarynan kórindi. Arnaıy dıplomdar men 100 myń teńgeniń sertıfıkatyna ıe boldy. Sonymen qatar 18 azamat «Úzdik mádenıet qyzmetkeri» atansa, birqatar qyzmetkerler «Mádenıet salasynyń úzdigi» tósbelgisimen, túrli dárejedegi qurmet gramotalarymen, alǵys hattarmen marapattaldy. Jalpy osy kúni 50-den astam mádenıet qyzmetkeri marapattaldy.
Saltanatty jıynda sóz sóılegen oblys ákimi Amandyq Batalov kásibı merekemen quttyqtap, mádenıet salasynyń qoǵam ómirindegi mańyzyna toqtalyp ótti.
"Mádenıet - ulttyń qýaty, ǵasyrlar boıy úzilmeı kele jatqan rýhanı bolmysy, aqyl-oı, parasaty. Elbasymyz Nursultan Ábishuly: «Mádenıet - eldiń eń basty rýhanı baılyǵy, asyl murasy. Qaı eldiń mádenıeti myqty damysa, sol eldiń eńsesi de bıik bolady», - dep ataı kele, «Eýrazııanyń eń bir baı da biregeı mádenıeti - qazaq mádenıeti» degen edi. Halyqqa sapaly mádenı qyzmet kórsetý úshin salanyń materıaldyq-tehnıkalyq bazasyn nyǵaıtý basty nazarymyzda. Mádenıet salasyn damyta otyryp jáne sizderdeı zııaly qaýym, óner adamdaryn qurmetteı otyryp, biz jastardy tárbıeleımiz", - dedi A. Batalov.
Jalpy óńirdiń mádenıet salasynyń bıýdjeti 2015-16 jyldarǵa qaraǵanda 40 paıyzǵa ósip, bıylǵy jyly 7,6 mlrd. teńgege jetti. Mádenı nysandardyń kúrdeli jóndeý jumystary men jobalyq smetalyq qujattaryn jasatýǵa barlyǵy 870,2 mln. teńge bólindi.
