Taldyqorǵandaǵy Іlııas Jansúgirov atyndaǵy ýnıversıtetke 45 jyl toldy
TALDYQORǴAN.QazAqparat - Búgin Taldyqorǵandaǵy І. Jansúgirov atyndaǵy Jetisý memlekettik ýnıversıteti 45 jyldyǵyn atap ótti. Oqý ornynyń aıtýly datasy sheńberinde ǵylymı-zertteý ınstıtýty ashyldy, dep habarlaıdy QazAqparat tilshisi.
JOO ujymy men stýdentterin mereıtoıymen oblys ákimi Amandyq Batalov quttyqtap, ýnıversıtet janynan qurylǵan ǵylymı-zertteý ınstıtýtynyń ashylýyna qatysty. Instıtýttyń quramynda eki - bıogeotehnologııa jáne agrobıotehnologııa zerthanalary bar. Olardyń jumysy taý-ken jáne agrarlyq ónerkásip salalaryna ınnovatsııalyq bıotehnologııalyq tásilderdi engizýge negizdeledi. Qazirgi kezde ınstıtýtta doktorlar men ǵylym kandıdattaryn qosqanda 9 qyzmetker bar. Zertteý jumystaryna «Bıologııa» jáne «Ekologııa» fakýltetterinde oqıtyn stýdentter de tartylady.
Instıtýt jumysymen keńinen tanysyp, zerthanany aralaǵan oblys basshysy osyndaǵy qyzmetkerlerdiń jumysyna tabys tilep, tilektestigin bildirdi. Sonymen qatar olardyń agrobıotehnologııa salasyndaǵy eńbekteri búgingi kún úshin, ásirese bizdiń agro-ındýstrıaldy oblysymyz úshin jáne aýyl sharýashylyǵyna ınnovatsııalardy engizý jumysy atqarylyp jatqan shaqta asa mańyzdy sanalatynyn atap ótti.
Munan soń Amandyq Batalov JOO-nyń 45 jyldyǵyna arnalǵan saltanatty sharaǵa qatysyp, quttyqtaý tilegin jetkizdi.
«Qazaq poezııasynyń Qulageri Іlııas Jansúgirovtiń atymen atalǵan ýnıversıtet jarty ǵasyrǵa jaqyn ýaqyt ishinde otandyq bilim júıesinde óz orny men dástúri bar bilim ordasyna aınaldy. Ýnıversıtet túlekteri óńirimizdiń ekonomıkasynyń ár salasynda eńbek etip júr. Ásirese, pedagog mamandardyń 90 paıyzǵa jýyǵy - Jetisý memlekettik ýnıversıteti daıarlaǵan kadrlar. Táýelsizdiktiń alǵashqy jyldarynda Prezıdentimiz Nursultan Ábishuly Nazarbaevtyń ýnıversıtetke arnaıy kelip, damýdyń basty baǵyttaryn aıqyndap berýi oqý ornynyń órkendeýine tikeleı áser etti. Elbasymyzdyń joǵary bilim berý júıesin damytý jónindegi tapsyrmalaryna oraı, búgingi tańda ýnıversıtette zaman talabyna saı jas býyndy oqytyp, tárbıeleý jaqsy jolǵa qoıylǵan. Jetisýdyń basty bilim ordasynda oqyǵan jastarymyz oblystyń, elimizdiń abyroıyn asyra bersin! Ýnıversıtet ujymyna mol tabys tileımin!», - dedi A. Batalov.
Bilim ordasynda oblys ákiminiń grantymen bilim alyp jatqan stýdentter oqýyn oqý jylynyń sońyna deıin aıaqtaýy úshin 35 mln teńgeniń sertıfıkatyn tabystady. Sonymen qatar oblys ákimi ýnıversıtet rektory Kýat Baımyrzaevqa oblys ákiminiń alǵys hatyn jáne bilim ordasynyń birqatar qyzmetkerlerine qurmet gramotalaryn tapsyrdy. Shara barysynda Amandyq Batalovqa «Qurmetti professor» ataǵy berildi.
Saltanatqa Іlııas Jansúgirovtiń uly Saıat Jansúgirov arnaıy qatysty. Jıyn ýnıversıtet túlekteriniń, oqytýshylarynyń, stýdentter men qonaqtardyń izgi tilekterimen jalǵasty.
Jalpy, І. Jansúgirov atyndaǵy Jetisý memlekettik ýnıversıtetin qurylǵannan beri 49000 túlek bitirgen. Olardyń 35 myńy - pedagogıkalyq mamandyqtar boıynsha támamdaǵan. Túlekter arasynda ǵaryshker-synaqshy, avıatsııa general-maıory, «Halyq qaharmany» Aıdyn Aıymbetov, Atlantadaǵy Olımpıada oıyndarynyń júldegeri, qola medal ıegeri Máýlen Mamyrov ta bar. Búgingi kúni ýnıversıtette 6 myń stýdent oqıdy. Olardyń ishinde 40-y mamandyq boıynsha - bakalavr, 21-i - magıstr, 6-ýy - doktoranttar. Bıylǵy jyly ýnıversıtet tuńǵysh ret Eýropa men Orta Azııanyń damýshy úzdik joǵary oqý oryndarynyń arnaıy reıtınginde aldyńǵy qatardaǵy 300-diktiń ishine kirdi. Al ulttyq reıtıng boıynsha kópsalaly JOO 12-shi orynda.
