Taldyqorǵanda «Júregi jyrdan jaralǵan» atty aqyndar men ánshiler baıqaýy ótti
Taldyqorǵan qalasyndaǵy І. Jansúgirov atyndaǵy Mádenıet saraıynda el Táýelsizdiginiń 25 jyldyǵyna oraı Qazaqstan halqy tilderiniń merekesi aıasynda qazaqtyń kórnekti aqyny, Qazaqstannyń Halyq jazýshysy, Tumanbaı Moldaǵalıevtiń poezııasyn ardaq tutý, nasıhattaý, jas talanattardy tanytý maqsatynda «Júregi jyrdan jaralǵan» atty respýblıkalyq jazba aqyndar men ánshiler baıqaýy tuńǵysh ret ótti, dep habarlaıdy zhetysu.gov.kz.
ASTANA. QazAqparat - Baıqaýdyń shymyldyǵyn quttyqtaý sózben ashqan oblys ákiminiń birinshi orynbasary Lázzat Turlashov til aılyǵy qorytyndysy boıynsha birqatar azamattarǵa Almaty oblysy ákiminiń, QR Mádenıet jáne sport mınıstrliginiń Qurmet gramotalaryn tapsyrdy. Sondaı-aq til janashyrlaryna Tilderdi damytý jónindegi basqarmasynyń Qurmet gramotalary da berildi.
Osy kúni Til basqarmasynyń «Ádebıet portalymen» birlesip ótkizgen «Poezııa, menimen egiz be ediń?!» atty onlaın-músháıranyń jeńimpazdary marapattaldy. «Qazkontent» AQ «Ádebıet portaly» ınternet jobasynyń jetekshisi Baýyrjan Qaraǵyzuly portaldyń Muqaǵalı Maqataev atyndaǵy syılyǵyn tapsyrdy.
Shara barysynda T. Moldaǵalıev týraly fılm kórsetildi.
«Júregi jyrdan jaralǵan» respýblıkalyq baıqaýyna Qazaqstan Respýblıkasynyń Halyq ártisi, Memlekettik syılyqtyń laýreaty Nurǵalı Núsipjanov, qazaqtyń kórnekti aqyny, Memlekettik syılyqtyń laýreaty Ulyqbek Esdáýletov, aqyn, Halyqaralyq «Shabyt» jastar festıvaliniń eki márte laýreaty Baýyrjan Qaraǵyzuly, dástúrli ánshi, oblystyq mádenıet, muraǵattar jáne qujattama basqarmasynyń basshysy Aqan Ábdýáli, oblystyq tilderdi damytý jónindegi basqarmanyń basshysy Ahmet Kendirbekuly qazylyq etti. Óner saıysyna elimizdiń barlyq oblystary men qalalarynan 29 jas qatysty.
Jas aqyndar T. Moldaǵalıevke arnaǵan jáne táýelsizdik taqyrybyndaǵy eki óleńin oqysa, jas ánshiler aqynnyń sózine jazylǵan ánderdi oryndady.
Baıqaý júldegerlerine oblystyq tilderdi damytý jónindegi basqarmanyń dıplomdary men aqshalaı syılyqtary tabys etildi. Ánshiler arasynda bas júldeni Astana qalasynan kelgen Ánel Smaıylova ıelense, atyraýlyq jas aqyn Serik Qoıshyǵulov ózge úmitkerlerden oza shyǵyp, bas júldeni jeńip aldy.
