Taldyqorǵanda jol aqysy qymbattady
TALDYQORǴAN.QazAqparat - Taldyqorǵanda jańa jyldyń alǵashqy kúninen bastap qoǵamdyq kóliktegi bılet baǵasy 20 teńgege qymbattady. Osy ýaqytqa deıin turǵyndar qoǵamdyq kólikte jol aqysyna 60 teńge tólep kelse, endi 1 qańtardan bastap 80 teńge tóleıtin boldy, dep habarlaıdy QazAqparat tilshisi.
Oblys ortalyǵynda 29 baǵdar boıynsha 7 merdiger mekeme jolaýshy tasymaldaýmen aınalysady. Jolaqynyń qymbattaýyna janar-jaǵarmaıdyń jáne qosalqy bólshekter baǵasynyń ósýi basty sebep bolǵan. Qala ákimdigi bul qadamǵa jan-jaqty saraptap, qoǵamdyq uıymdar súzgisinen ótkizip barǵanyn aıtady. Biraq oqýshylar men stýdentterdiń, 1 jáne 2 toptaǵy múgedekter jáne 70 jastaǵy zeınetkerlerdiń tegin júrý jeńildikteri saqtalady.
«2015 jyly bilseńizder bir lıtr janarmaıdyń quny 89 teńge bolsa, qazir 160 teńge boldy. Ekinshi sebep jańaǵy qosalqy bólshekter, akkýmýlıator bolsyn, shınaldar bolsyn qazirgi naryqqa baılanysty 40-50 paıyzǵa qymbattaǵandyqtan osyndaı sheshimge keldik», - dedi qalalyq jolaýshy kólik jáne avtomobıl joldary bóliminiń sektor meńgerýshisi Qýat Qanıet.
