Taldyqorǵanda Jetisý aspanyn baǵyndyrǵan arý turady
TALDYQORǴAN.QazAqparat - 22 jastaǵy boıjetken paraplanmen ushý sportyn qolǵa alǵan óńirdegi birden bir názik jan, dep habarlaıdy «Qazaqparat» tilshisi.
Aspanda qalyqtaýǵa bala kezinen ińkár bolǵan sýretshi qyzdyń esimi búginde Almaty oblysynda keńinen málim. Emılııa Kýpbaeva árbir áýege ushýǵa tyńǵylyqty daıyndalady. Mundaı jaǵdaıda jeldiń soǵysy, aýa aǵysy sııaqty qubylystardyń bári mańyzdy. Sportshy ushý baǵytyn soǵan qarap baǵamdaıdy. Paraplanmen aınalysqanyna bir jyl bolǵan arý úshin bul hobbı. Degenmen ol áýege kóterilgen kezde bir demalyp qalatynyn aıtady. Eshteńe oılamaı, qalyqtap, qııalǵa qanat bitirýge bolatynyn jasyrmaıdy.
Emılııa bir jylda birtalaı jetistikke qol jetkizgen. Paraplanerler dodasynda el chempıonatynda úzdik atanyp, halyqaralyq saıysqa joldama aldy. Qazirgi tańda Albanııada ótetin álem chempıonatyna daıyndalyp jatyr. Jattyqtyrýshysy ári oblystyq paraplanerler klýbynyń jetekshisi Igor Vershkıdiń aıtýynsha halyqaralyq dodaǵa Almaty oblysynan bes adam qatysady. Qatarynda Emılııa Kýpbaeva da bar. Ekstrımaldy sport óńirde jaqsy damyp keledi. Taldyqorǵannan 20-ǵa jýyq paraplanershi bar. Al aspanǵa ańsary aýyp turatyn názik qyzdyń negizgi kásibi sýret dızaınerlik óner. Ol jıhazdardyń jańa túrlerine ár beredi. Bala kezinen sýret salýǵa qushtar bolǵan názik jandyny eliktiretin kók aspan. Suńqar qustaı qanat qaǵyp, bıikte samǵaý arqyly jetisýlyq arý óz armandary men maqsattaryna jerde de qol jetkizýge bolady degen pikirde.
