Taldyqorǵanda «Jetisý - adaldyq alańy» jobalyq keńsesi ashyldy
«Jetisý - adaldyq alańy» jobasy sybaılas jemqorlyq deńgeıin tómendetý, jalpyqoǵamdyq tózbeýshilikti qalyptastyrý. Joba aıasynda ashylǵan keńse oblys ákimdiginiń birinshi qabatynda ornalasqan.
Ashylý saltanatynda oblystyq bilim, densaýlyq saqtaý basqarmalarynyń, memlekettik kirister, ishki ister departamentteriniń basshylary, oblystyq sottyń ókilderi óz salalaryndaǵy tsıfrlandyrý jobalaryn tanystyryp, osyǵan oraı materıaldyq bazany nyǵaıtý sharalary jaıly aıtyp berdi. Memlekettik qyzmet isteri agenttiginiń tóraǵasy Alık Shpekbaev osy tanystyrylǵan jobalar arqyly jumystyń tıimdiligi, ilgerileý kórinýi tıistigin atap ótti.
Munan soń A.Shpekbaev Jetisý jeriniń aktıvimen jáne qoǵam belsendilerimen kezdesti. Kezdesýde oblys ákimi Amandyq Batalov óńirdegi sybaılas jemqorlyqpen kúres jáne onyń aldyn alýǵa baǵyttalǵan sharalarǵa qysqasha toqtaldy. Máselen, óńirde qoǵamnyń jemqorlyqqa tózbeýshiligin qalyptastyrýǵa arnalǵan 300-den astam shara ótkizilgen, sybaılas jemqorlyqqa qarsy 27 jedel top quryldy. «Adal jol - Chestnyı pýt» jemqorlyqqa qarsy marafony uıymdastyryldy. Oblysta jyl basynan beri 7,3 mln teńgege memlekettik qyzmet kórsetilse, sonyń 79,4% elektrondy túrde kórsetilgen. Memlekettik qyzmet sapasyn arttyrý maqsatynda oblystyq Tsıfrlyq tehnologııalar basqarmasy qurylyp, aýdan, qala ákimdikterinde memlekettik qyzmet monıtorıngisi bólimderi jasaqtaldy.
Jıyn barysynda «Astana - adaldyq alańy» jobalyq keńsesiniń basshysy Jazıra Jylqyshıeva Astana qalasynda jemqorlyqqa qarsy baǵyttalǵan jumystar jóninde baıandady. Atap aıtqanda, Saryarqa aýdany men №10 emhana bazasynda júrgizilgen jobalyq jumystar tilge tıek etildi.
QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Almaty oblysy boıynsha departamentiniń basshysy Serikbaı Nurǵısaev «Jetisý - adaldyq alańy» jobasynyń 3 basym baǵyty týraly aıtyp berdi. Sonyń ishinde memlekettik qyzmet alýda adamı faktordy azaıtý, qoǵamdyq baqylaýdy júzege asyrý jáne sybaılas jemqorlyqqa qarsy mádenıetti qalyptastyrý baǵytyndaǵy jumystar, sonymen qatar departament pen ádep keńesiniń jumysy jaıly sóz qozǵady.
Óz kezeginde agenttik tóraǵasy Alık Shpekbaev Memleket basshysynyń tapsyrmasyna oraı kásibı memlekettik apparat qalyptastyrýdaǵy jańa bastamalarǵa keńinen toqtaldy. Sonyń ishinde tsıfrlandyrý, kúndelikti turmystyq jemqorlyq áreketterine jol bermeý, kadrlardy qaıta daıarlaý, eńbekaqy tóleminiń jańa júıesi, ІT karta engizý jáne basqa da ózgerister jaıly aıtyldy. Osy jańa reforma túptep kelgende memlekettik qyzmet sapasyn arttyrýǵa, onyń ashyqtyǵy men qoljetimdiligin qamtamasyz etýge, jemqorlyqty azaıtýǵa qyzmet etpek.
Kezdesý sońynda A. Batalov pen A. Shpekbaev «Jetisý - adaldyq alańy» jobasynyń jarǵysyna qol qoıdy. Sondaı-aq shara barysynda agenttik tóraǵasynyń Alǵys hatymen oblystaǵy birqatar azamat marapattaldy.
Munan soń A. Shpekbaev qaladaǵy birneshe nysandy aralady. Atap aıtqanda, Taldyqorǵan kópsalaly aýrýhanasynda, Taldyqorǵan qalasy boıynsha kirister departamentinde boldy.
Búgingi kúni oblystyq densaýlyq saqtaý basqarmasy Memlekettik qyzmet isteri jáne sybaılas jemqorlyqqa qarsy is-qımyl agenttiginiń Almaty oblysy boıynsha departamentimen birlesip «Jetisý - adaldyq alańy» jobasynyń aıasynda medıtsınalyq qyzmetti tsıfrlandyrý boıynsha birshama jumystar atqarǵan. Máselen, oblystyń 14 aýdanynda elektrondy kezek taqtalary ornatylyp, oblys boıynsha qamtý 70% jetken. Sonymen qatar «Jetisý» medıtsınalyq aqparattyq júıesimen aýdan ortalyqtary men qalalyq deńgeıdegi medıtsınalyq uıymdar 100% qamtamasyz etilgen.
Osy saparynda A. Shpekbaev Taldyqorǵan kópsalaly aýrýhanasynyń, jedel járdem qyzmetiniń, sondaı-aq onkologııalyq aýrýlardy erte kezeńnen anyqtaýǵa múmkindik beretin Sıtýatsııalyq ortalyqtyń jumysymen tanysty.
Agenttik tóraǵasy atbasyn burǵan memlekettik kirister organy týraly aıtsaq, búgingi tańda munda 48 memlekettik qyzmet túrleri kórsetilse, sonyń 32-si avtomattandyrylǵan. Mysaly, Taldyqorǵan qalasynda 2016 jyly kórsetilgen qyzmettiń úlesi elektrondyq túrde 90,3% quraǵan, 2017 jyly - 91,5% jáne 2018 jyldyń basynan beri - 92,7 % nemese 182 106 qyzmet kórsetildi. Bul rette memlekettik qyzmet sapasyn arttyrý úshin salyq tóleýshiniń termınaly jumys isteıdi, kórsetiletin qyzmetter termınaldarda tegin júrgiziledi, sol sııaqty QR QM MKK Jaǵdaıattyq ortalyǵyna qosylǵan kezek basqarýdyń elektrondyq júıesi jumys isteıdi.
Munan ári A. Shpekbaevtyń sapary Qaratal aýdany Úshtóbe qalasynda jalǵasty. Munda Memlekettik qyzmet alýshylarǵa jaıly jaǵdaılar jasaý men azamattardyń tsıfrlyq saýattylyǵyn arttyrý maqsatynda bıylǵy jyly iske qosylǵan «Servıstik ákimdiktiń» jumysymen tanysty.
«Servıstik ákimdik» jobasynyń qaǵıdalary memlekettik qyzmet kórsetetin mekemelerdi bir jerde shoǵyrlandyrý men azamattarǵa yńǵaıly jaǵdaılar jasaýǵa negizdelgen. «Servıstik ákimdik» azamattarmen tyǵyz baılanysta jumys jasaýǵa jáne turǵyndarǵa qalanyń túkpir-túkpirinde ornalasqan bólimderdi izdemeı-aq memlekettik qyzmetterdi bir ǵımarattan alýǵa múmkindik beredi.
Jobaǵa 41 memlekettik qyzmetti kórsetetin aýdannyń eń qajetti degen birqatar mekemeleri, atap aıtqanda Úshtóbe qalasy ákiminiń apparaty, bilim berý, sáýlet jáne qala qurylysy, jer qatynastary, jolaýshylar tasymaly jáne avtomobıl joldary bólimderi, Qaratal aýdany ákimdiginiń Jumyspen qamtý ortalyǵy da qosylǵan. Jalpy, osy ǵımarat ashylǵaly beri 4878 memlekettik qyzmet kórsetilgen. Osy rette,aq «Servıstik ákimdikte» memlekettik organdardyń ashyqtyǵyn qamtamasyz etý maqsatynda jergilikti atqarýshy organdardyń bólimderi Open space - ashyq kabınalarda ornalasqanyn aıta ketken jón.
Oblysqa jasaǵan saparynyń sońynda A. Shpekbaev Qaratal aýdanynyń aktıvimen kezdesti. «Servıstik ákimdikke» oń baǵa berip, mundaı jobanyń aýdandyq deńgeıde alǵash ret sátti iske asyp otyrǵanyn atap ótti. «Sapaly memlekettik qyzmet kórsetýde Open space rejımindegi ashyqtyq prıntsıpin qatań ustanatyn mundaı nysandardy barlyq jerlerde ashýymyz kerek», - dedi agenttik tóraǵasy.