Taldyqorǵanda jergilikti ákimdik jabaıy saýdamen kúresip jatyr
TALDYQORǴAN.QazAqparat - Úsh kúnnen beri Taldyqorǵan ákimdigi jabaıy saýdamen kúres júrgizip, kóshe boıynda saýda jasaıtyndardy jappaı qýyp jatyr.
Jumystyń qyzý júrgizilgeni sonshalyq ákimdiktegiler saýdagerlerdiń saýda jasaıtyn oryndaryn túngi ýaqytta arnaıy kólikpen tazalap tastaǵan, - dep habarlaıdy QazAqparat tilshisi.
«Meniń 1 mln teńge nesıem bar. 4 balam bar. Kúıeýim týberkýlez aýrýyna shaldyqqan. Úkimetten úı surap jatqan joqpyn. Aqsha surap jatqan joqpyn. Nege qarapaıym halyqtyń jaǵdaıyn oılamaıdy. Bizge ákimdiktiń usynǵan jerlerinde saýda júrmeıdi», - deıdi saýdager Roza Ibraımova.
«Bir kúnde 100-ge jýyq adam dalada qaldyq. Osynshama adamǵa ákimdik jumysty qaıdan taýyp bermek», - dedi sharasyz qalǵan saýdager Janna Belavına.
Qańtardyń qara sýyǵynda dalada qalǵan saýdagerler Taldyqorǵandaǵy bazarlar jekeniń qolyna ótip ketken dep narazy. Sáıkesinshe munda jalǵa berý quny da aspandap turǵanyn aıtady.
«Men qolymnan kelgenshe halyqqa kómekteskendi jaqsy kóremin. Biraq zań bar, talap bar. Jalpy sizderdiń jaǵdaıdy oblys ákimine jetkizemin, qalanyń ákimi jumysqa shyqty. Qorytyndysyn aıtamyz. Múmkin, kommýnaldyq bazardan, múmkin ortalyqtan ba oryn qarastyramyz», - dedi Almaty oblysy ákiminiń orynbasary Baǵdat Mánzorov.
Biraq saýdagerler sheneýnikten olarǵa tek ortalyq bazardan oryn taýyp berýin ótindi. Sózderinshe, saýda osy jerde ǵana jaqsy júredi.
Sondaı-aq ákimniń orynbasary el aıtqan eshbir bazardyń ıesi emes jáne bul kósheni tazartýdy da eshkimge tapsyrmaǵan. Bári zań talaby, qalalyq ákimdiktiń sheshimi dep sóılegen sózin saýdagerler telefonǵa túsirip alypty.
«Men bazarǵa shulyq ákep satamyn. Qazir qýyp jiberdi. Ash qalmaý úshin bireýdiń ydysyn jýatyn shyǵarmyn», dep saýdager Baqytgúl kózine jas aldy.
Jaıma bazarda shulyq satyp, qazir nápaqasynan aıyrylǵan analardyń turmys jaǵdaılary nashar. Máselen Baqytgúldiń úıiniń esiginen tesigi kóp. 11 aılyq balasy bar jalǵyzbasty ana qýyqtaı bir bólmeli úıdi 30 myńǵa jaldap turady eken. Sharasyz otyrǵan eki balanyń anasy Baǵdat Mánzorovtyń kómektesetinine senip, basqa saýdagerler sııaqty júregine sál de bolsa úmit oralyp, qaıtty.
