Taldyqorǵanda jedel járdem kóliginde áıel bosanyp, kólik apatqa tústi

TALDYQORǴAN. QazAqparat - Taldyqorǵanda aıaǵy aýyr kelinshek perzethanaǵa jetpeı, jedel járdem kóliginde bosanyp qaldy, - dep habarlaıdy QazAqparat tilshisi.

Jetisý oblystyq jedel járdem stantsııasynyń baspasóz qyzmetiniń málimetinshe, aıaǵy aýyr kelinshekti Qapal aýylynan alyp kele jatqan. Taldyqorǵandaǵy oblystyq perınataldyq ortalyqqa barýy tıis áıeldiń tolǵaǵy kólik ishinde qysyp, feldsherlerge ony kóliktiń ishinde bosandyryp alýǵa týra kelgen.

«Taldyqorǵandaǵy shyǵys shaǵynaýdanda jedel járdem kóligin ózge kólik soǵyp, oqıǵa ornynan qashyp ketti. Qazir tergeý júrip jatyr. Al bala men ananyń da jaǵdaıy jaqsy, dúnıege ul keldi. Olar anasymen perınataldyq ortalyqqa jetkizildi»- dep málimdedi atalǵan vedomstvonyń baspasóz qyzmetinen.

«Jedel járdem kóliginde bosanǵan áıel 1997 jylǵy. Úshinshi balasyn bosandy. Sábıdiń salmaǵy 4 keli. Ul bala. Qazir náresteniń de, anasynyń da jaǵdaıy jaqsy»,- dedi oblystyq perınataldyq ortalyqtyń dırektory Qanat Qalıhanuly.

Al Jetisý oblystyq polıtsııa departamenti baspasóz qyzmetiniń málimetinshe, ázirge kólik tabylmaǵan, izdeý jumystary júrgizilýde.