Taldyqorǵanda jaıaý júrginshiler ótkelinde eki áıeldi qaǵyp ketken júrgizýshi ustaldy
TALDYQORǴAN. QazAqparat - Taldyqorǵanda jaıaý júrginshiler ótkelinde eki áıeldi qaǵyp ketken júrgizýshi ustaldy, - dep habarlaıdy QazAqparat tilshisi.
Almaty oblystyq Polıtsııa departamenti baspasóz qyzmetiniń málimetinshe, 8 qyrkúıek kúni saǵat 15:00 shamasynda «Mercedes-Benz» avtokóliginiń júrgizýshisi Taldyqorǵan qalasyndaǵy Qabanbaı batyr kóshesinen Aqyn Sara kóshesine burylý kezinde jaıaý júrginshiler ótkelinen ótip bara jatqan 70 jáne 56 jastaǵy eki jergilikti turǵyndy qaǵyp, oqıǵa ornynan qashyp ketken. Zardap shekkender túrli dene jaraqattarymen aýrýhanaǵa jetkizildi.
Bir táýlik ishinde polıtsııa qyzmetkerleri Qarabulaq aýylynyń 49 jastaǵy júrgizýshi men avtokóliktiń turǵan jerin anyqtady. Júrgizýshi ustalyp, avtokólik aıyppul turaǵyna qoıyldy.
Ustalǵan sátte júrgizýshi ortasha masań kúıde bolǵan. Ol jol-kólik oqıǵasyn jasap, oqıǵa orynynan qashyp ketkenin tolyq moıyndady. Turǵyn bul qylyǵynyń sebebin soqqyǵa jyǵylǵandyqtan dep túsindirdi.
Medıtsınalyq mekemeden ambýlatorlyq emdelýge kóshirilgen jábirlenýshilerdiń biri kúdiktini tez qolǵa túsirgeni úshin polıtseılerge shyn júrekten alǵysyn bildirdi. Ekinshi zardap shekken azamatsha aýrýhanada emdelýin jalǵastyrýda.
Atalǵan derek QR QK-niń 345-babynyń 1-bóligi jáne 347-bap «Abaısyzda adamnyń densaýlyǵyna aýyrlyǵy ortasha zııan keltirýge ákep soqqan kólik quraldaryn paıdalaný qaǵıdalaryn buzý», «Jol-kólik oqıǵasy bolǵan jerden ketip qalý» boıynsha tergelýde.
