Taldyqorǵanda «Jas ushqysh» mektebi ashyldy
Atalǵan qosymsha bilim berý uıymynda 160 bala avıatsııa salasynyń alǵashqy álippesi týraly dáris alatyn bolady.
Almaty oblysynyń ákimi Qanat Bozymbaev mekteptiń ashylý rásimine qatysyp, ondaǵy oqýshylarymen kezdesti. Oqýshylar saraıyndaǵy arnaıy jasaqtalǵan kabınettiń materıaldyq bazasymen tanysqan Qanat Bozymbaev balalardy merekelerimen quttyqtap, tilegin jetkizdi.
«Kúni erteń bireýiń ushqysh, biriń stıýardessa, endi biriń bort mehanıgi bolyp, bolashaq ómirlerińdi avıatsııamen baılanystyrýlaryń múmkin. Bul mektep sol arman-maqsattaryńa jol kórsetedi. Bolashaqta oblys aýmaǵynda avıatsııalyq kolledj ashylady, elimizde azamattyq avıatsııa akademııasy, áskerı ýchılışeler bar. Osy mektepten qanattanyp shyǵyp, bilimderińdi sol oqý oryndarynda jalǵastyrýlaryńa bolady. Osy mektepte jaqsy oqyp, durys bilim alyp, Taldyqorǵannyń atyn shyǵaryp, úlken dárejege jetesińder dep senemin. Aıdyn Aıymbetovteı azamat bolýlaryńa tilektespin «, - dedi Q.Bozymbaev.
Oblys ákiminiń aıtýynsha, mundaı mektep tek Aqtóbede bar. Bul - elimizde ashylyp otyrǵan ekinshi mektep. Balalarǵa kásibı baǵyt-baǵdar berýde bul úıirmeniń bereri kóp bolmaq.
Qonaqtarmen áńgimelesý barysynda balalar armandaryn aıtyp, oı bólisti. Máselen, mektepke alǵashqylardyń biri bolyp jazylǵan Dınara Dıhanbekova: «Men kishkentaı kezimnen stıýardessa bolǵym keletin. «Jas ushqysh» mektebi ashylǵanda qatty qýandym. Ushaqta adamdardy kúlip shyǵaryp salyp, kúlip qarsy alǵym keledi «, - deıdi .
Balalardyń biri ekologııaǵa zııansyz jańa ushaq qurastyrýdy armandasa, endi biri ushaqtyń árbir usaq tetikteriniń bárin meńgergisi keledi. «Jas ushqysh» úıirmesiniń jetekshisi Sergeı Chernyshovtyń aıtýynsha, munda 5-10 synyp oqýshylary - 20 baladan 8 top, ıaǵnı 160 bala dáris almaq. Olarǵa sabaq-tapsyrmalar jas erekshelik deńgeıine qaraı beriledi. Pedagogıkalyq ujymda 3 jetekshi jumys isteıdi.
Foto: gov.kz