Taldyqorǵanda jas ádebıetshilerdiń alǵashqy forýmy ótti
TALDYQORǴAN.QazAqparat - Taldyqorǵanda jas ádebıetshilerdiń «Jetisý kóktemi» atty alǵashqy forýmy ótti, dep habarlaıdy QazAqparat tilshisi.
Aqyndar men jazýyshalar Jetisý óńiriniń tarıhı jáne mádenı oryndarynda bolyp, shabytyna shabyt qosty. Poezııa keshterinde shyǵarmalaryn oqyp, arnaıy semınarlarǵa qatysty. Forým barysynda respýblıkalyq «Rýh» ádebı baıqaýynyń qorytyndysy boıynsha jaryqqa shyqqan kitaptardyń tusaýy kesilip, bir top jas qalamger Qazaqstan Jazýshylar Odaǵyna múshelikke qabyldandy. «Máńgilik eldiń muraty» atty jabyq ádebı baıqaýdyń nátıjesinde úzdik dep tanylǵan eki ádebıetshi Almaty oblysy ákiminiń «Aq qaýyrsyn» ádebı júldesiniń ıegeri atanady. Proza janry boıynsha Qanat Ábilqaıyr al, poezııa boıynsha Saǵynysh Namazshamova top jardy.
«Jas qalamgerdiń kóńiline, júregine bir rýhanı dán sebildi dep aıtýǵa bolady. Bul shyǵarmashylyqtyń dáni. Bul keleshekte kádimgideı tamyrlanyp, óziniń jemisin beretinine senimim zor», dedi QR Jazýshylar odaǵynyń tóraǵasy Ulyqbek Esdáýlet.
