Taldyqorǵanda jańa týǵan náresteniń baýyryna ota jasaldy
TALDYQORǴAN. QazAqparat - Búgin Taldyqorǵanda dúnıege kelgenine ekinshi kún bolǵan nárestege ota jasaldy. Almaty oblystyq balalar aýrýhanasynyń dárigerleri sábıdiń baýyrynan jylaýyqty (kısta) alǵan, dep habarlaıdy QazAqparat tilshisi.
Almaty oblystyq densaýlyq saqtaý basqarmasyndaǵy baspasóz qyzmetiniń ókili Láılim Áýbakirovanyń aıtýynsha, balanyń baýyrynda kısta bar ekeni anasynyń jatyrynda jatqanda anyqtalǵan.
«Anasynyń jatyrynda jatqan sábıdiń baýyryna kısta jabysqany segizinshi aıynda anyqtaldy.Biraq balanyń ómirine qaýip tónbegendikten dárigerler otany náreste dúnıege kelgende jasaýdy sheshken. Sábı 24 qańtar kúni týyldy. Búgin ota jasaldy. Qazir ol jansaqtaý bóliminde jatyr. Jaǵdaıy turaqty», - dedi atalǵan vedomstvanyń ókili L.Áýbakirova.
Mamannyń sózinshe, operatsııa barlyǵy sátti ótken. Anasynyń da, balanyń da jaǵdaıy jaqsy.
