Taldyqorǵanda jańa kópqabatty úıdiń jertólesi káriz sýyna tolyp qaldy
«Birlik» shaǵynaýdanynyndaǵy 18-úıdiń paıdalanýǵa berilgenine 3 jyl boldy.
Osy az ǵana ýaqyt ishinde káriz júıesi 4-5 ret bitelip qalǵan. Jertólege jaıylǵan nájiske toly sýdyń ıisi qolqany qabady.
«Mysaly meniń balalarym maǵan osy páterdi ózderiniń aq-adal eńbegimen alyp berdi. Kredıtin áli tólep bolǵan joq, basqalar da bul úıdi nesıege alǵan. 21 ǵasyrda osyndaı nájistiń ishinde otyrý endi sumdyq jaǵdaı ǵoı. Júıesi durys jasalmaǵandyqtan, qaıta-qaıta bitelip, jertóle nájiske tolyp jatyr, menińshe. Mine, bir aptanyń ishinde ekinshi ret jertóle káriz sýyna tolyp qaldy. Terezeni asha almaımyz, ashsaq, ıisi úıge kiredi. Podezdiń ishine kire almaısyń. Sasyq. Turǵyndar ana káriz sýyn ózimiz aqsha jınap sorǵyzamyz. Men qarsymyn»,- deıdi páter turǵyny Záýre Áýbákerova.
Taldyqorǵan qalalyq turǵyn úı ınspektsııasyndaǵylar atalǵan úıdiń 2 jyldyq kepildik merzimi ótip ketkenin jetkizdi.
Sol sebepti úıdi kútip ustaýǵa turǵyndardyń ózderi jaýapty.
«Kepildeme ýaqyty ótken. Onyń ýaqyty ótkennen keıin ár páterdiń turǵyndary óz úıin ózderi kútip ustaýy kerek»,- deıdi Taldyqorǵan qalalyq turǵyn úı qatynastary jáne turǵyn úı ınspektsııasy bólimi basshysynyń mindetin atqarýshy Berik Abylhan.
Al sol úıge jaýapty basqarýshy kompanııa ókilderi jertóledegi sýdy sorý kezinde túrli zattar shyǵatynyn aıtady.
«Aldyńǵy kúni taǵy da biteldi. Bitelý sebebi - kárizdi tutas tazalaǵanda úlken shúberek shyqty. Kádimgi eden jýatyn materıal. Sol sebepten bitelip, 18-shi úıdiń úshinshi podezinen qaıta sý aqqan»,- deıdi basqarýshy kompanııa basshysy Meıirjan Ákimbek.
Kárizdiń bitelýine turǵyndar kináli me, álde qubyr júıesi durys salynbaǵan ba - ol jaǵy belgisiz.
