Taldyqorǵanda jańa balabaqsha ashyldy
TALDYQORǴAN. QazAqparat - Astana kúni merekesine oraı Taldyqorǵanda 50 oryndyq jańa balabaqsha ashyldy. Mektepke deıingi mekemede balalardy aǵylshyn tilinde oqytatyn arnaıy kýrstar qarastyrylǵan, dep habarlaıdy QazAqparat tilshisi.
Sondaı-aq tárbıelenýshilerdi úılerinen balabaqshaǵa tasymaldaıtyn kólik te bar. Mekeme basshylyǵynyń sózinshe, baqshanyń aqysy aıyna 18-20 myń teńge. Tasymaldaý quny da osynyń ishine kiredi.
«Ózim osy salanyń mamanymyn. Qazir 6 tárbıeshi bar. Jalpy 20 shaqty adam jumyspen qamtylyp otyr. Kúzge deıin taǵy 100-120 oryndyq ǵımaratty ashýdy josparlap otyrmyz. Bilimdi urpaq tárbıeleýge bar kúsh-jigerimizdi salamyz», - deıdi balabaqsha meńgerýshisi Gúlbarshyn Kenjebekova.
Aıta ketý kerek, búginde Taldyqorǵan qalasy boıynsha balalardy balabaqshamen qamtý deńgeıi 92,5 paıyzǵa jetti.
