Taldyqorǵanda jańa balabaqsha ashyldy
TALDYQORǴAN.QazAqparat - Jańa jyl merekesi qarsańynda Taldyqorǵanda 45 oryndyq «Nurǵazız - 2» atty jańa balabaqsha paıdalanýǵa berildi, dep habarlaıdy QazAqparat.
Jalpy aýmaǵy 250 sharshy metr bolatyn eki qabatty ǵımaratta 18 adam eńbek etedi.
Bul kásipker Roza Eginbaeva ashyp otyrǵan ekinshi jekemenshik balabaqsha. Jyl basynda 50 oryndyq «Nurǵazız» balabaqshasy iske qosylǵan bolatyn.
«Halyqtyń suranysyna oraı, ekinshisin ashyp otyrmyn. Balabaqsha asham degen kásipkerlerge búginde memleket bar jaǵdaıdy jasap otyr. Bizge de qalalyq ákimdik kóp kómektesti. Birinshi balabaqshany ashqanda qujattardy rásimdeýge biz 5-6 aı ýaqyt jumsasaq, ekinshisin 2-aq aıda ashyp aldyq. Balabaqsha úshin ata-analar aı saıyn 15 myń teńge tóleıdi. Balalar bizde qazaq jáne orys tilin qajetinshe ıgerip shyǵady», - deıdi kásipker.
Taldyqorǵan qalasy ákiminiń orynbasary Márlen Kólbaev atap ótkendeı, bul qalada bıyl ashylyp otyrǵan 12-shi jekemenshik balabaqsha. Qazir Taldyqorǵan boıynsha 60 mektepke deıingi tárbıe mekemesi bar. 6 jasqa deıingi balalardy baqshamen qamtý kórsetkishi - 87 paıyz. Memlekettik-jekemenshik áriptestik negizinde aldaǵy jyly osyndaı taǵy 5 nysan ashý josparlanýda.
