Taldyqorǵanda jańa asfaltti qaıta jańartqan ákimdik óz áreketine túsinikteme berdi
TALDYQORǴAN. QazAqparat - Taldyqorǵandaǵy kottedji qalashyqtaǵy jańa asfaltti qaıta jańartqan ákimdik óz áreketine túsinikteme berdi, dep habarlaıdy QazAqparat tilshisi.
Jergilikti bloger jańa asfaltti qaıta jańartqan shendilerdiń áreketine shaǵymdanyp, beıneúndeý jarııalady.
«Bul kottedjdi qalashyqty 2-3 jyl buryn saldy. Qarańyzdarshy, jańa asfalt, jaǵdaıy jaqsy. Bul jańa shaǵyn aýdan. Jańa jol boldy, biraq jańa joldy, qaıta jańartty»,- dedi bloger óz beınejazbasynda.
Taldyqorǵan qalasy ákimdiginiń baspasóz qyzmeti blogerdiń narazylyǵyna jaýap berdi.
«Kottedjdi qalashyqtaǵy 15,4 shaqyrym jol 2008-2011 jyly salynyp, 2011 jyly paıdalanýǵa berilgen. Bıyl joldyń shuryq tesigin, búlingen jerlerin jóndeý úshin jumystar júrgizilýde. 15,4 shaqyrym joldyń 6,5 shaqyrymy jóndeledi. Jumystar 20 kósheniń altaýyna jasalady», - delingen vedomstvonyń jaýabynda.
