Taldyqorǵanda «Jańa álipbı - uly dáýir bastaýy» atty jıyn ótti
«Biz, ıaǵnı qazaq tilin latyn álipbıine kóshirý jónindegi jumys toby, 2 apta boıy Almaty oblysynyń 9 aýdanyn aralap, jıyndar ótkizdik. Turǵyndar Elbasynyń bastamasyn qoldap otyr. Mine, kúni keshe ǵana Prezıdent qazaq álipbıin kırılıtsadan latyn grafıkasyna kóshirý týraly Jarlyqqa qol qoıdy. Bul - tarıhı sheshim. Endi bizdiń jumys tobymyzdyń jospary ózgeredi. Aldaǵy ýaqytta biz aýdandardy jańa álipbıdi túsindirý boıynsha aralaımyz», - deıdi oblystyq Tilderdi damytý jónindegi basqarma basshysy Aıdar Kárbozuly.
Jıynǵa qatysqandar da óz oılaryn ortaǵa saldy. Til oqytý ortalyǵynyń qyzmetkeri Janar Álmuhametqyzynyń aıtýynsha, aldaǵy ýaqytta 26 qazan memlekettik merekelerdiń qatarynan kórinýi múmkin.
«Biz - tarıhı sáttiń kýágerlerimiz. Bolashaqta 26 qazan elimizdegi eń mereıli merekelerdiń biri bolady dep oılaımyn. Álipbı aýystyrý - rýhanı jańǵyrýymyzdyń jarqyn bastaýy. Bul álipbımen biz Alash arystarynyń eńbekterin túpnusqada oqıtyn bolamyz. Al, túpnusqa men aýdarmanyń arasynda aıyrmashylyq bolatyny besenden belgili. Óshkenimiz jandy degen osy», - deıdi Til oqytý ortalyǵynyń qyzmetkeri.
Aıta ketelik, jańa álipbı boıynsha 32 árip bar. Endi osyǵan deıin qoldanylyp kelgen til erejeleri ózgeriske ushyraıdy. «Bul - naqty sala mamandarynyń jumysy bolmaq. Al, biz jańa álipbıdi qoldaımyz!» dep tarqasty jınalǵandar.
Aıta ketelik, «Taldyqorǵan aqshamy» gazetiniń sońǵy 2 nómirinde 2 materıal latyn grafıkasymen joba retinde berilgen bolatyn. Halyqtyń kózin úıretýge arnalǵan bundaı jumystar gazet betinde aldaǵy ýaqytta da jalǵaspaq.
