Taldyqorǵanda jalǵan polıtseı ustaldy
TALDYQORǴAN.QazAqparat - Almaty oblysynyń Uıymdasqan qylmysqa qarsy kúres basqarmasyndaǵylar 32 jastaǵy taldyqorǵandyqty alaıaqtyq jasady degen kúdikpen ustady, dep habarlaıdy QazAqparat tilshisi.
"Polıtsııaǵa qonaq úılerdiń biriniń ákimshiligi aryzdandy. Ol jerde olardy belgisiz azamat ózin uıymdasqan qylmysqa qarsy kúres basqarmasynyń qyzmetkerimin dep tanystyryp, 150 myń teńgege jýyq aqsha bopsalaǵany jóninde jazylǵan. Sondaı-aq belgisiz azamat túrli memlekettik organdar arqyly sol qonaq úıge tekseris júrgizemiz dep ses kórsetip, qorqytady eken",- dep málimdedi Almaty oblystyq polıtsııa departamentiniń baspasóz qyzmeti.
Boljam boıynsha, er azamat 150 myń teńgege jýyq aqshany birden almaǵan. Ol bul qarajatty eki-úsh aıdyń ishinde 30-40 myń teńge kóleminde alyp otyrǵan. Qazir osy iske baılanysty sot-aldy tergeýmen Taldyqorǵannyń polıtseıleri aınalysýda.
"Kúdikti dál osy qonaq úıge kelgen sátinde ustalyp, qalalyq polıtsııaǵa jetkizildi. Ustalǵan 32 jastaǵy azamattyń esh jerde jumys istemeıtini anyqtaldy. Qazir kúdiktiniń ózge qylmystarǵa qatysy bar-joǵy anyqtalyp jatyr",- dep tolyqtyrdy polıtsııa ókilderi.
