Taldyqorǵanda Jaqsylyq Úshkempirov jaıly fılm túsirilip jatyr
TALDYQORǴAN. QazAqparat - Taldyqorǵandaǵy «Jastar» sport saraıynda qazaqtan shyqqan tuńǵysh Olımpıada chempıony (Máskeý, 1980), grek-rım kúresiniń palýany Jaqsylyq Úshkempirov jaıly fılmniń epızodtary túsirilip jatyr. Búgin taldyqorǵandyqtar akterlermen kezdesip, ózderin qyzyqtyrǵan saýaldaryna jaýap aldy, dep habarlaıdy QazAqparat tilshisi.
Dál qazirgi sátte Taldyqorǵandaǵy «Jastar» sport saraıynyń basty alańy 1980 jyly Máskeýde ótken Olımpıadadan syr shertip tur. Bul jerdegi barlyq kórinis sol zamannyń aǵymyna alyp keledi. Zaldyń ishi olımpıadany tamashalap, qoldaý kórsetip jatqan kórermenge toly. Osylaısha Taldyqorǵanda Jaqsylyq Úshkempirov jaıly fılmniń epızodtary qyzý túsirilip jatyr. Al teatr akteri Oljas Saq chempıonnyń ómirindegi naǵyz mańyzdy sáttiń birin somdaýda. Jaqsylyq Úshkempirovtyń jastyq shaǵyna bet-álpeti óte uqsas jigit kınoǵa túsý úshin eki aı boıy jattyqqanyn jetkizdi.
«Men osy fılmge túsý úshin eki aı boıy jattyǵý zalynan shyqpaı daıyndaldym. Oqýshy kezimde erkin kúreske qatysqan bolatynmyn. Al munda klassıkalyq kúresten jattyǵý jasaý kerek boldy. Sonymen qatar, Jaqsylyq aǵamyzdyń kóptegen tásilderin qaıtalaý aýyr tıdi. Qazirgi kúni oǵan da etim úırendi», - dedi jastarmen kezdesý barysynda Oljas Saq.
Sondaı-aq fılmde jattyqtyrýshynyń rólin Reseı akteri Dmıtrıı Gýdım somdaıdy. Al quramada birge bolǵan Shamıl men Rezantsevtiń rólderi Nurǵısa Qýanyshbaıuly men reseılik Artem Krysınge júktelgen. Reseı akteri Artem Krysın Taldyqorǵannyń tamasha tabıǵatyna tamsandy.
«Bizde (Reseıde) kún bulaı túse bermeıdi. Al Taldyqorǵanda kún sáýlesi shýaǵyn keńinen shashady eken. Munyń ózi kóńil-kúıge jaqsy áser etetinin baıqadym», - dedi ol.
Jalpy fılmniń epızodtary Taldyqorǵannan ózge qalalarda da júrgizilgen. Máselen, buǵan deıin túsirilim Óskemen qalasynda júzege assa, birshama bóligi Belarýs memleketinde de taspaǵa basylǵan.
Kezdesý sońynda qala jastary akterlermen estelik sýretke tústi.
Aıta ketý kerek, atalǵan shara Taldyqorǵannyń qala kúni aıasynda uıymdastyryldy. Al shahar jurtshylyǵy qala kúnin 29 qyrkúıekte keń kólemde atap ótpek. Basty merekege deıin bir aı kóleminde turǵyndardyń nazaryna túrli sharalar usynylýda.
