Taldyqorǵanda zańsyz taksıshilerge qarsy reıd bastaldy
TALDYQORǴAN. QazAqparat - Taldyqorǵan qalasynda taksı qyzmetimen zańsyz aınalysatyndardy anyqtaýǵa baǵyttalǵan reıd ótýde, dep habarlaıdy QazAqparat tilshisi.
Bul sharalar jol qozǵalysy qaýipsizdigin qamtamasyz etý maqsatynda uıymdastyryldy. Atap aıtqanda, patrýldik polıtsııa qyzmetkerleri avtovokzaldar men olarǵa irgeles jatqan kólik júretin bólikterdiń aýmaqtarynda tártip ornatýda. Zańnama normalaryn, qoldanystaǵy jol qozǵalysy erejelerin jáne jeke tasymaldaý erejelerin buzýmen aınalysqan júrgizýshiler ákimshilik jaýapkershilikke tartyldy.
«Vokzal mańyndaǵy aýmaqty tańdaýymyzdyń sebebi – jergilikti turǵyndardan túsken turaqty shaǵymdar boldy. Olardyń aıtýynsha, qalaaralyq taksıster jol erejelerin jıi elemeı, jol-kólik oqıǵasyna ákelip soǵatyn jaǵdaılar týdyrady», - dedi Taldyqorǵan qalalyq polıtsııa basqarmasynyń ákimshilik tájirıbe bóliminiń basshysy Samat Esbolov.
Eki saǵat ishinde belgilenbegen oryndarda aıaldaǵan jáne turǵan, sondaı-aq tıisti qujattarsyz jolaýshylardy tasymaldaýmen aınalysqan 27 júrgizýshige ákimshilik quqyq buzýshylyq týraly hattama toltyryldy.
«Búgingi jumystar «Quqyqtyq tártip» respýblıkalyq jedel-aldyn alý sharasy aıasynda júrgizilýde. Sonymen qatar, vokzal mańyndaǵy aýmaqtarda kóshe-jol jelisi men jol qozǵalysyn retteýdiń tehnıkalyq quraldary tekserilýde. Joldardy kútip ustaýdyń barlyq anyqtalǵan eskertýleri boıynsha, sondaı-aq jol belgileri men jol tańbalary boıynsha ýákiletti organdarǵa nusqama jiberildi. Mundaı reıdter júıeli túrde júrgiziletin bolady dep sendiremin», - dep tolyqtyrdy S. Esbolov.
