Taldyqorǵanda voleıboldan Qazaqstan chempıonaty ótip jatyr
TALDYQORǴAN.QazAqparat - Almaty oblysynyń ortalyǵynda voleıboldan joǵary lıgadaǵy erler komandalary arasynda Qazaqstan chempıonaty ótip jatyr, dep habarlaıdy QazAqparat tilshisi.
El birinshiligi 5 týrdan turady. Taldyqorǵandaǵy jarys sonyń birinshi kezeńi. Bul topta Qostanaıdyń Dınamosy, Aqtóbe, qyzylordalyq Qaısar, Shymkenttik Qazyǵurt pen Oraldyń Jaıyǵy jáne jergilikti Jetisý komandalary óz arasyndaǵy chempıondy anyqtaıdy. Bulardyń ishindegi eń jas ujym ol Almaty oblysynyń quramasy. Komanda 16 men 21 jas aralyǵyndaǵy voleıbolshylardan jasaqtalǵan. Mamandardyń pikirinshe, júldeli orynnan birden bir úmitkerler de osylar. Al jetisýlyq komanda alǵashqy kezdesýin Qostanaıdyń Dınamosymen ótkizip, 3 sette de basym tústi.
Aıta keteıik, bul kúni Qazyǵurt Jaıyqty utsa, Aqtóbe Qaısardan aılasyn asyrdy. Joǵary lıga komandalary arasyndaǵy 1-shi týr oıyndary qarashanyń 27-sine deıin jalǵasady.
