Taldyqorǵanda ulan sarbazdary órtengen úıden gaz ballondary men bir adamdy alyp shyqty
TALDYQORǴAN. QazAqparat - Taldyqorǵanda ulandyqtar órtengen úıden eki gaz ballon men aýa jetpeı qysylǵan adamdy alyp shyqty, dep habarlaıdy Polisia.kz.
Órt 28 sáýirde saǵat keshki 20.10-da Taldyqorǵanda bolǵan. Qala kóshelerin patrýldep júrgen Ulttyq ulan 5514 áskerı bóliminiń áskerı qyzmetshileri shaǵyn aýdandardyń birinen órtengen úıdi baıqaıdy. Ulandyqtar bul týraly dereý áskerı jasaqtar boıynsha kezekshige, oqıǵa týraly órt sóndirýshi brıgadaǵa habarlap, shuǵyl órt shyqqan úıge jetken. Jaǵdaıdy baǵamdaǵan patrýldi top qyzmetin baqylaýshy leıtenant Abaı Dáýletkeldınov kómekke jaqyn jerdegi úsh áskerı jasaqty shaqyrǵan. Áskerı qyzmetkerler birlese atalǵan úıdiń ıesine órt sóndirýshiler kelgenshe tilsiz jaýdy aýyzdyqtaýǵa kómektesedi.
Órtke oranǵan úıge kirgen ulandyq Abaı Dáýletkeldınov úıde aýa jetpeı tunshyǵyp jatqan adamdy dereý syrtqa shyǵaryp, oǵan alǵashqy medıtsınalyq kómek kórsetken.
