Taldyqorǵanda turmysy tómen otbasynyń balalary aǵylshyn kýrsyna tegin qabyldandy
TALDYQORǴAN.QazAqparat - Taldyqorǵandaǵy Erkin aýyldyq okrýginde «Rýhanı jańǵyrý» baǵdarlamasy aıasynda aǵylshyn tilin oqytý ortalyǵy ashyldy. Bul jerde múmkindigi shekteýli jáne áleýmettik turǵydan az qamtylǵan otbasynan shyqqan balalar aǵylshyn tilin tegin oqyp-úırenedi, dep habarlaıdy QazAqparat.
Aǵylshyn kýrsyn jergilikti kásipkerlerdiń biri ashty. Qaltaly azamat osylaısha «Atameken» kishi baǵdarlamasynyń «Týǵan jer» arnaıy jobasyn júzege asyrýǵa meılinshe atsalysyp jatyr. Qazir ortalyqtaǵy «English kids» aǵylshyn tili kýrsyna 12 bala kelip júr. Til úıretý sabaǵy aptasyna eki ret bir saǵattan ótedi. Kásipker buǵan deıin Taldyqorǵan qalasynan tap osyndaı 4 keńse ashqan.
«Múmkindigi shekteýli balalardyń qol motorıkasy óte az damyǵan. Sol úshin biz balalarǵa arnalǵan oıynshyqtar jáne neshe túrli pazldar aldyryp, sol arqyly balalardyń motorıkasymen qosa aǵylshyn tilin birge úırenýge kóp jumys jasap jatyrmyz. Muǵalimderimizdiń barlyǵy tájirıbeli», deıdi kásipker Mádına Qurmanǵalıeva.
Aǵylshyn tilin 5 bilikti muǵalim oqytady. Balalarynyń tegin til úıretý kýrsyna barýǵa múmkindik alǵanyna ata-analar dán rıza.
