Taldyqorǵanda týrızmdi damytýdyń jańa tetikteri talqylandy
ASTANA. QazAqparat - Almaty oblysynyń Týrızm basqarmasy Almaty óńirinde týrızmdi damytýdyń máseleleri boıynsha keńes ótkizdi. Shara Memleket basshysynyń «Bolashaqqa baǵdar: Rýhanı jańǵyrý» baǵdarlamalyq maqalasy men «Tsıfrly Qazaqstan» baǵdarlamasy aıasynda týrızm salasyn damytýdyń tyń tetikterin talqylaý maqsatynda uıymdastyryldy, dep habarlaıdy QazAqparat tilshisi.
Otyrys barysynda qazaqstandyqtardyń arasyndaǵy demalys mádenıetin qalyptastyrý, týrızm statıstıkasyn jolǵa qoıý, oblystyń týrıstik áleýetine qatysty málimetterdi tsıfrlandyrý boıynsha máseleler qaraldy.
2018 jyldyń 15 mamyrynda Almaty oblysynda týrızm nysandaryn ınventarızatsııalaý boıynsha joba bastalǵan bolatyn. Onyń qorytyndysyna sáıkes, Almaty oblysynda týrızmdi órkendetýdiń sheber-jospary daıyndalyp, týrıstik ınfraqurylym nysandary tsıfrlandyrylatyn bolady.
«Inventarızatsııa qorytyndysynyń aralyq esebi kórsetip otyrǵandaı, ómir súrýge arnalǵan orynnyń sany 833-ke, al bos ýaqytty ótkizýge arnaǵan sýbektterdiń sany 233-ke artqan», - deıdi Qazaqstannyń Týrıstik Agenttikteri qaýymdastyǵynyń prezıdenti, «Open Travel Advisory» JShS basshysy Ásel Núrkebaeva.
Qasıetti jerler boıynsha Almaty oblysynda týrıstik ónimderdi daıarlaý úshin qazirgi tańda «Zhetysu Discovery-2018» atty ǵylymı ekpedıtsııa uıymdastyrylyp jatyr.
«Ekspedıtsııaǵa qatysýshylar búginge deıin 24 tarıhı-mádenı nysandardy aralap úlgerdi. Ekspedıtsııa barysynda tabylǵan barlyq aqparattar arnaıy týrıstik baǵdarlamalardy daıarlaýda negiz bolady. Sonymen birge, Almaty oblysynyń Týrızm basqarmasy TripAdvisor onlaın-brondaý halyqaralyq platformasy negizinde mıkrosaıttardy qurý boıynsha jumystardy júrgizýde», - dedi Almaty oblystyq Trızm basqarmasynyń basshysy Janar Alshynbaeva.
