Taldyqorǵanda Turǵyn úı qurylys jınaq banki arqyly páter alǵandar shaǵymdanyp jatyr
TALDYQORǴAN.QazAqparat - Taldyqorǵanda Turǵyn úı qurylys jınaq banki arqyly baspanaly bolǵan turǵyndar shaǵymdanyp jatyr. Aıtýlarynsha, úıde ystyq sý múlde joq, al sýyq sý tek besinshi qabatqa deıin bar. Toǵyzynshy qabatqa deıin aýyz sý múldem joq. Gaz da qosylmaǵan. Sonymen qatar, jańa úıdiń aýlasy múldem abattandyrylmaǵan, dep habarlaıdy QazAqparat tilshisi.
Al «Turǵyn úı qurylys jınaq bankiniń» Almaty oblysy boıynsha fılıaly dırektorynyń orynbasary Qýandyq Nurǵalıev jańa qonys ıelerine páter kiltterin berýdi ýaqytsha toqtatqanyn aıtty.
«6 shaǵyn aýdanda 171 páterli úıdiń 94-i baspanalarynyń kiltterin aldy. Al qalǵan páterlerdiń kiltterin berýdi ýaqytsha toqtattyq. Negizi bizge jergilikti bılik úıdiń daıyn bolǵandyǵy jóninde hat jiberedi. Biz sol qatynas qaǵazdy alǵannan keıin kiltterdi berip bastadyq. Artynan kommýnaldyq-sharýashylyq mekemesinen kiltterdi berýdi toqtatyńyzdar degen qatynas qaǵaz aldyq. Sebebi, bul mekeme ózderiniń sheshilmeı jatqan máselesi baryn aıtty», - dedi Qýandyq Nurǵalıev.
Taldyqorǵan qalasynyń ákimdigi ystyq sý men gaz halyq 100 paıyz qonystanǵannan keıin beriletinin aıtty. Al sýyq sý máselesi jaqyn arada sheshiletinin jetkizdi.
«Aýyz sýǵa baılanysty aıtar bolsaq, sý besinshi qabatqa deıin ǵana kóteriledi, ary qaraı toǵyzynshy qabatqa deıin jetpeı jatyr. Sý tartatyn nasos isten shyqqan bolatyn. Osy aptanyń ishinde sý qosylady dep josparlanýda. Qazir jóndeý jumystary júrip jatyr. Bul 171 páterli úıdegi keleńsiz jaıttardyń ózindik sebepteri bar. Máselen, úıdiń aýlasyn abattandyrý jumystary merdigerdiń durys jumys atqarmaýy sebebinen toqtap tur. Qazir osyǵan baılanysty sot protsesi júrip jatyr. Sot bitkennen keıin, kelesi merdiger ol jerdi jasaıtyn bolady», - dedi Taldyqorǵan qalasy ákiminiń baspasóz hatshysy Danııar Janys.
Aıta ketý kerek, 171 páterli úıde bir bólmeli páterdiń quny 5 mln 200 myń teńgeden bastalady. Al eki bólmeli páterler 7 mln teńgeniń kóleminde. ıAǵnı, baspananyń bir sharshy metri 140 myń teńge. 1 bólmeli páterler 39-45 sharshy metr. Turǵyndar bul úılerdiń qunyn 25 jyl ishinde tólep bitýleri tıis. Qazir úı ıeleri páterlerinde turatyndaı jaǵdaı bolmasa da, eki aıdan beri nesıeleriniń aqshasyn tólep jatyr. Jáne 94 adamnyń basym bóligi jańa úılerine kóship kelip, turyp jatyr. Páterlerinde sýyq sý bolmaǵandyqtan turǵyndar daladaǵy dárethanaǵa barady.
Aıta ketý kerek, Taldyqorǵanda qonys ıeleriniń narazylyǵyn týdyrǵan 171 páterli úı «Nurly jer» baǵdarlamasy arqyly salynǵan bolatyn.
