Taldyqorǵanda tuńǵysh ret Qoshqar chempıonaty ótti
TALDYQORǴAN. QazAqparat - Taldyqorǵanda etti jáne júndi qoshqarlar arasynda chempıonat ótti. Tuńǵysh ret uıymdastyrylǵan sharaǵa 40-tan asa sharýashylyq shopan ata tólin jarysqa qatystyrdy, - dep habarlaıdy QazAqparat tilshisi.
Etti baǵyt boıynsha birinshi oryndy Aqsý aýdanynyń Qyzylaǵash aýylyndaǵy Berikbol Bazarbaevtyń 93 keli tartatyn qoshqary jeńip alsa, al júndi baǵyt boıynsha 1-shi oryn Qaratal aýdanynyń «Baqyt-Qaratal» sharýa qojalyǵyna buıyrdy. Olar ákelgen qoshqardyń salmasy 102 keli. Jalpy eki baǵytta ótken saıysta qoshqarlardyń boıy, jasy, keýdesiniń kólemi, salmaǵy esepteldi. Al qazylar alqasynyń músheleri arasynda Aýyl sharýashylyǵy mınıstrligi Mal sharýashylyǵy ónimderin óndirý jáne qaıta óńdeý departamentiniń dırektory Erkebulan Ahmetov, Aýyl sharýashylyǵy ǵylymdarynyń doktory Nurlan Malmaqov syndy mamandar boldy.
«Bul qazaqtyń bııazy júndi, qaratal tıpi qoshqary 12-14 kelige deıin, al saýlyǵy 5-6 keli jún beredi. Al júnniń naryqtaǵy baǵasy 1000 teńge. Qazirgi kúnde júnge degen suranys óte kóp. Jylyna 30 tonna jún ótkizemiz. Buıyrtsa, osy tuqymdy kóbeıtip, aldaǵy ýaqytta eksportqa shyqsaq degen maqsatymyz bar. Qazirgi kúni 7 myńǵa jýyq qoıymyz bar», -dedi júndi baǵyt boıynsha birinshi oryn alǵan «Baqyt-Qaratal» sharýa qojalyǵynyń dırektory Serikjan Jeksembıev.
Jeńimpazdarǵa 1-orynǵa 150 myń teńge, ekinshi orynǵa 100 myń teńge, úshinshi orynǵa 50 myń teńge berildi. Al tuńǵysh ret uıymdastyrylǵan sharany «Qazyna» agroholdıngi uıymdastyrdy.
«Bul sharanyń negizgi maqsaty - bizdiń kompanııanyń qurylǵannan bergi 11 jyl ishinde jetken nátıjesin kórsetý. 11 jyl ishinde biz shaǵyn sharýashylyqtan agroholdıngke aınaldyq. Osy sharany ótkizýge QR Aýyl sharýashylyǵy mınıstrligi men «Atameken» UKP qoldaý bildirdi. Bastapqyda bizde 93 bas bolǵan. Qazir 2,5 myń bas asyl tuqymdy sharýashylyqqa jetkizdik. Onyń ishinde 1900 bas analyq bas, 600 bas taza asyl tuqymdy qoshqarlar. Bizdiń negizgi tuqymymyz gempshır jáne sýffolk, nemese qazaqı tez jetiletin qoshqar. Men sol tuqymnyń negizgi avtorlarynyń biri bolamyn. Osy tuqym bolyp bekitilip shyqqanyna bes jyldyń kólemi boldy. Tek etti baǵytta ǵana jumys isteımiz, óıtkeni álemge tamaq kerek. Jańa jarysta kórdińizder, merınos qoılaryn ustaıtyndar renjimesin, bul qoshqarlardyń salmaǵy 80-nen ári aspaı jatty», - dedi «Qazyna» agroholdınginiń tóraǵasy Almasbek Sadyrbaev.
Sondaı-aq mınıstrlikten kelgen departament basshysy sýbsıdııa alýdyń joldary jáne baǵdaralamalar jaıly sharýa qojalyqtaryna aıtyp berdi.
