Taldyqorǵanda tótenshe jaǵdaı tártibin buzǵan qoǵamdyq monsha ıesine aıyppul salyndy
TALDYQORǴAN. QazAqparat - Almaty oblysy ortalyǵynyń turǵyny elimizdiń aýmaǵynda jarııalanǵan tótenshe jaǵdaı tártibin buza otyryp, ózine tıesili qoǵamdyq monshasynyń qyzmetin toqtatpaǵan, dep habarlaıdy QazAqparat tilshisi.
«Tekserý kezinde monshada kóp adamnyń bar ekeni anyqtaldy. Monshanyń ıesine QR ÁQbK 476-babynyń 3-tarmaǵy boıynsha ákimshilik hattama toltyryldy. Taldyqorǵan qalasynyń mamandandyrylǵan aýdanaralyq soty TJ jaǵdaıynda quqyq buzýshyny 5 táýlikke qamaýǵa alý týraly sheshim shyǵardy», - dedi Taldyqorǵan qalalyq prolıtsııa basqarmasynyń bastyǵy Asqar Nursapa.
Óz kezeginde, tártip saqshylary barlyq turǵyndardy tez taralatyn qaýipti indetke jáne elimizdegi tótenshe jaǵdaıǵa baılanysty bekitilgen erejelerdi qatań saqtaýǵa, halyqtyń jappaı aýrý juqtyrýyna jol bermeýge shaqyrady.
«Ár adam bul máselege óte jaýapty qaraýy tıis. Kez kelgen qatelik orny tolmas qaıǵy men talaı jannyń ólimine alyp kelýi múmkin. Іndetti jeńý men halqymyzdyń amandyq-saýlyǵy árqaısymyzǵa baılanysty ekenin umytpaý qajet. Óıtkeni, aýrý qatelik pen kemshilikti keshirmeıdi», - dedi qalanyń bas polıtseıi Asqar Nursapa.
