Taldyqorǵanda tonaýshy beınebaqylaý kameralary arqyly quryqtaldy
TALDYQORǴAN. QazAqparat - Taldyqorǵan kóshelerine ornatylǵan beınebaqylaý kameralary qalalyq dárihanany tonaǵan er azamatty qolǵa túsirýge kómektesti, dep habarlaıdy QazAqparat tilshisi.
Oqıǵa ótken táýlikte boldy. «Jastar» shaǵyn aýdanyndaǵy dárihanalardyń birinen 340 myń teńge qoldy boldy degen aqparat qalalyq polıtsııa qyzmetine kelip túsken. Kezekshiler kúdiktiniń túr-sıpatyn shuǵyl túrde jedel basqarý ortalyǵyna jetkizgen. Ortalyqtyń ınspektorlary oqıǵa ornynyń mańynan kúdiktini anyqtap, nusqaý boıynsha shyqqan patrýldik polıtsııa qyzmetkerleri 28 jastaǵy er azamatty qolǵa túsirdi. Tintý kezinde kúdiktiden urlanǵan qarjy tabyldy. Qazirgi tańda atalǵan fakti boıynsha qylmystyq tekserý bastaldy.
Aıta ketý kerek, jyl basynan beri Taldyqorǵan kóshelerinde ornatylǵan beınebaqylaý kameralary arqyly 86 qylmys ashyldy. Onyń ishinde 40 qylmys tonaý jáne usaq urlyqpen baılanysty. Jedel basqarý ortalyǵynyń mamandarynyń kómegimen jedel áreket etý toptary 33 buzaqyny, 4 avtokólik urlaýshyny, 2 zorlyq-zombylyq kórsetken adamdy jáne 2 qaraqshyny qolǵa túsirgen.
