Taldyqorǵanda terezeden qulap ólgen stýdent týraly jańa derekter belgili boldy
TALDYQORǴAN.QazAqparat - Taldyqorǵanda kolledj ǵımaratynyń 3-qabattaǵy terezesinen qulaǵan stýdent alǵashqyda óziniń aýyryp turǵanyn aıtyp shaǵymdanǵan, dep habarlaıdy QazAqparat tilshisi.
«Tarıh páni bolatyn. Jańaǵy stýdent ózin jaısyz sezinip turǵanyn aıtty. Muǵalim medbıkege bar dep eskertken. Biraq stýdent qyz barmaǵan. Qyz barmaımyn degen soń muǵalim basqa oqýshyny medbıkeni shaqyryp kelýge jumsaǵan. Medbıke kelgenshe stýdentter men muǵalim sabaǵyn ári qaraı jalǵastyra bergen. Sol kezde jańaǵy aýyryp otyrǵan stýdent terezeden sekirip ketken», - deıdi Taldyqorǵandaǵy gýmanıtarlyq kolledj dırektorynyń orynbasary Baqyt Samalbaev.
Onyń aıtýynsha, stýdenttiń qulaǵan sáti kolledj ǵımaratyndaǵy beınekameraǵa túsip qalǵan.
Bul aıǵaqty tergeýshiler iske tirkep, qazir «Ózine qol jumsaýǵa ıtermeleý» baby boıynsha sotqa deıingi tergeý júrip jatyr.
Esterińizge sala keteıik, buǵan deıin 17 jastaǵy stýdent qyzdyń 3-qabattaǵy terezeden qulap ketkenin habarlaǵan bolatynbyz.
