Taldyqorǵanda teatrdyń jańa ǵımaraty ashyldy
TALDYQORǴAN. QazAqparat - Taldyqorǵanda zamanaýı teatr ǵımaraty ashyldy. Ásem ǵımaratqa oblys bıýdjetinen 6 mlrd teńgege jýyq qarjy bólingen, dep habarlaıdy QazAqparat tilshisi.
Bıken Rımova atyndaǵy drama teatrdyń jańa ǵımaratynyń ashylýy Orta Azııa elderiniń 7-shi Halyqaralyq teatr festıvalimen tuspa-tus keldi. Jańa teatrdyń shymyldyǵyn shańyraqqa qonystanǵan óner ıeleri qazaq klassıkasynyń jaýhary - Muhtar Áýezovtyń «Aıman-Sholpan» komedııasymen ashady.
«Bul festıvalǵa Bashqurtstan, Túrkııa, Túrkimenstan, Qyrǵyzstan, Ózbekstan memleketterinen teatr ujymdary jáne KSRO halyq ártisi, Memlekettik syılyqtyń laýreaty, Qazaqstan teatrlary assosatsııasynyń tóraǵasy Asanáli Áshimov bastaǵan qazylar alqasy músheleri qatysyp otyr. Sonymen qatar, atalmysh óner dodasy kórnekti memleket jáne qoǵam qaıratkeri Temirbek Qarauly Júrgenovtiń 120 jyldyǵyna arnalyp otyrǵany da urpaq sabaqtastyǵy dep esepteımin», - dedi Almaty oblysynyń ákimi Amandyq Batalov teatrdyń ashylýy saltanatynda. 
Jańa teatr Taldyqorǵan qalasynyń 7-yqsham aýdanynda boı kóterdi. Eki qabattan turatyn ǵımarattyń jalpy aýdany 10 538 sharshy metr. Kórermen orny 510 adamǵa laıyqtalǵan.
Esterińizge sala keteıik, 2016 jyldyń 12 qazan kúni teatrdyń alǵashqy qazyǵy qaǵylǵan kezde Amandyq Batalov zamanaýı drama teatrdy Jetisý tórinde salýǵa Elbasynyń ózi qoldaý bildirgenin aıtqan bolatyn. Bul aqjoltaı habardy sol sátte Taldyqorǵan qalasyndaǵy B. Rımova atyndaǵy drama teatrynyń ujymy úlken qýanyshpen qabyldap, sheksiz alǵystaryn bildirdi.
