Taldyqorǵanda táýligine 500 tonna maıly daqyl óńdeıtin zaýyt ashyldy

Kásiporynnyń saltanatty ashylý rásimine Almaty oblysynyń ákimi Amandyq Batalov, memleket jáne qoǵam qaıratkeri, Halyq qaharmany, Eńbek Eri Sergeı Tereşenko jáne belgili kásipker Temirhan Dosmuhambetov qatysty.

«Indýstrıaldy aımaqtyń tabysty jumys isteýine jergilikti bılik barlyq jaǵdaıdy jasady. Jaryǵy bar, sýy, gazy, barlyq qajetti ınfraqurylymdary bar. Endi tek qana kásiporyndar salyp, ónim shyǵarý kerek. Biz budan ári qospa jem óndirisin, jemis súrleý zaýytyn qurýdy josparlap otyrmyz. Al birinshi kezeńinde búgin ósimdik maıyn shyǵaratyn zaýyt ashtyq, kúnbaǵys pen rapstyń dánin óńdeımiz. Osy jaǵdaıdy paıdalanyp, ındýstrıaldy aımqqa jańa zaýyt salýǵa shaqyramyn, jańa jumys oryndaryn birge quryp, otandyq ónim óndirýge atsalysaıyq», - dedi S.Tereşenko.

Ol oblys basshylyǵyna, seriktesterine, qurylysshylarǵa jáne osy jobany júzege asyrýǵa atsalysqan jandardyń bárine rahmet aıtty.

Oblys ákimi Amandyq Batalov ta aldymen Qazaqstan halqynyń birligi kúnine oraı tilegin bildirip, mamyr merekesiniń mańyzyn atap ótti.

«Búgin elimizde erekshe mereke - Qazaqstan halqynyń birligi kúni. Biz jetistikterimizdiń barlyǵyna bereke-birligimizdiń, tatýlyǵymyzdyń arqasynda qol jetkizdik. Almaty oblysynda 100-den astam etnos ókilderi turady jáne olardyń árqaısysy óńirdiń áleýmettik-ekonomıkalyq damýyna aıryqsha úles qosýda. Olardyń arasynda kásipkerler men ınvestorlar kóp. Búgin biz birlesip «Taldyqorǵan» ındýstrıaldy aımaǵynda maıly daqyldar óńdep, ósimdik maıyn shyǵaratyn «Jetisý-Majıko» zaýytyn iske qosyp otyrmyz. Investorlarǵa zor alǵys aıtamyn. Biz óz tarapymyzdan ındýstrıaldy aımaq quryp, ony qajetti ınfraqurylymmen qamtamasyz ettik. Jalpy memleket qoldaýynyń jáne qabyldanǵan sharalardyń arqasynda ótken jyly Almaty oblysynyń ónerkásip óniminiń jalpy kólemi 1 trıllıon teńgege jýyqtady. Biz bárimiz birlesip, Elbasynyń basty tapsyrmalaryn, Tuńǵysh Prezıdentimizdiń sara jolyn jalǵastyryp kele jatqan Memleket basshysy Qasym-Jomart Toqaevtyń júktegen mindetterin oryndaý maqsatynda jumys istep kelemiz. Bul jumystar ınvestıtsııa tartýǵa, jańa tehnologııamen jumys isteıtin zamanaýı óndiris oryndaryn ashýǵa, jańa jumys oryndaryn qurýǵa baǵyttalǵan. Búgingi ashylyp otyrǵan zaýyt – sonyń aıqyn aıǵaǵy», - dep atap ótti oblys ákimi.

Munan soń bıznesmen, Qazaqstan Respýblıkasynyń eńbek sińirgen qaıratkeri Temirhan Dosmuhambetov sóz alyp, óńirdiń áleýmettik-ekonomıkalyq damýyndaǵy tabystarǵa toqtalyp ótti.

«Almaty oblysy óte jyldam damyp keledi, ınfraqurylymy jaqsy, oblys basshylyǵy ınvestorlarǵa qolaıly klımat qalyptastyrǵan, sondyqtan óńirge ınvestıtsııa tartylýda, óndiris órkendep, jańa jumys oryndary qurylýda. Sondyqtan jańa zaýyttyń ashylýymen barshańyzdy quttyqtaımyn. Osy zaýyttyń tabysty jumys isteýi úshin kelesi jyly 500 gektarǵa raps ósirip, odan ári alqabyn keńeıtip, qoldaý bildiremin», - dedi T.Dosmuhambetov.

Kásiporynnyń lentasy qıylǵannan soń jańa zaýyt jumysyna kiristi. Munan soń qonaqtar zaýyt ishin aralap, onyń jumysymen «Jetisý-Majıko» agrokesheni» JShS prezıdenti Sergeı Sımonov tanystyrdy.

Atap ótsek, jobanyń jalpy quny - 4,4, mlrd. teńge. Birinshi kezeńde 50 jumys orny ashyldy. Aldaǵy ýaqytta kásiporyn tolyq qýatyna shyqqanda jáne zaýyt irgesin keńeıtý arqyly 500-ge tarta jumys orny qurylady dep josparlanǵan. Bul jerde ystyqtaı syǵymdaý tásilimen ósimdik maıyn shyǵarady. Ol táýligine 500 tonna raps jáne 400 tonna kúnbaǵys óńdeıdi. Sonyń nátıjesinde ósimdik maıy men jom óndiriledi. Búgingi kúni zaýyt shıkizatpen 100 protsent qamtylǵan. Nemis óndirýshileriniń qural-jabdyqtary ornatylǵan. Sol arqyly alynatyn ónim sapasyn jaqsartý úshin maıly daqyl tuqymdaryn ekstrýzıondy tehnologııamen óńdeý tásili qoldanylady. Daıyn ónim jergilikti naryqqa shyǵarylady.

Oblys ákimi baspasóz qyzmetiniń habarlaýynsha, jaqyn arada Taldyqorǵanda jalpy quny 22,9 mlrd. teńge bolatyn, 528 jańa jumys oryndaryn quratyn taǵy 3 iri ınvestıtsııalyq joba iske asyrylady («Lýnıýan Jetysý», «Green Techology Partners», «Almaz Keramıks» JShS-lary), sonyń ekeýi «Taldyqorǵan» ındýstrıaldy aımaǵyna ornalastyrylady.