Taldyqorǵanda tártip saqshylarynyń úsh býyny turyp jatyr
TALDYQORǴAN. QazAqparat - Taldyqorǵanda tártip saqshylarynyń úsh býyn ókili turyp jatyr. Ardager polıtseı Nesipbek Tústikbaevtyń ózi, uly, kelini men nemeresi ishki ister salasynda eńbek etip, qoǵamdyq tártipti qamtamasyz etýge úles qosyp keledi, dep habarlaıdy QazAqparat tilshisi.
Sarqan aýdanynyń týmasy Nesipbek Tústikbaev áskerı boryshyn ótep kelgennen keıin partııa joldamasyn alyp, aýdandyq ishki ister bólimine qyzmetke turady. 1980-shi jyldardyń basynda mılıtsııa qatarynda eńbek jolyn bastap, Qapal aýdandyq ishki ister bóliminiń basshysy qyzmetine deıin kóterildi. 35 jyl ómirin quqyq qorǵaý salasyna arnaǵan ardager búginde óz urpaǵynyń áke jolymen kele jatqanyn maqtan tutady. Nesipbek Ábilhamıtulynyń aıtýynsha, ol balalary qaı salany tańdasa da qarsy bolmaǵan. Kerisinshe, armandarynyń oryndalýyna, maqsattaryna jetýine kómektesýge tyrysqan. Sondyqtan da bolar, uly Marat Ábilhamıtov búginde áke jolyn qýǵan polıtsııa qyzmetkeri. Ol Taldyqorǵan qalalyq ishki ister bólimi, jergilikti polıtsııa qyzmetin basqarady.
Marat Ábilhamıtov kishkentaı kezinen ákesiniń jumysyn kórip ósti. Ákesiniń qylmyspen kúreskenine, halyqqa kómektesip, aýyl men aýdannyń tártibin ornatýǵa kúsh salǵanyna qyzyǵa qarady. Qyzmettik formasyna qyzyqty. Aldyna maqsat qoıyp, búginde qalanyń tynyshtyǵyn qamtamasyz etýge ózi de atsalysyp keledi. 
Al onyń jary Shynar Ábilhamıtova jedel basqarý ortalyǵynda eńbek etedi. Monıtorlar arqyly qalada ornatylǵan kameralardan zań buzý faktilerin anyqtaıdy. Jedel topqa tapsyrma berip, qylmystyń aldyn alyp, quqyqbuzýshylarmen kúresedi. Tórt balanyń anasy joldasymen ıyq tiresip, qoǵamdyq tártipti qalyptastyrýǵa birge kúsh salyp jatqanyna maqtanyshpen qaraıdy.
Al shańyraq ıesi Nesipbek Ábilhamıtulynyń nemeresi de byltyrdan beri Eńbekshiqazaq aýdandyq ishki ister bóliminde jedel ýákil bolyp jumysyn bastady. Bıyl Reseıde joǵarǵy oqýyn támamdaıtyn kenje balasy da ishki ister salasynda jumys istesem degen maqsat qoıyp otyr. Demek polıtseıler áýletiniń qatary áli de tolyǵa túspek.
