Taldyqorǵanda tártip saqshylary úzdik mergenderdi anyqtady
TALDYQORǴAN. QazAqparat - Almaty oblystyq Іshki ister departamentiniń uıymdastyrýymen «Jaýyngerlik qarýdan nysana kózdeý» atty jarys óz máresine jetti. Atalǵan dodaǵa jıyrmadan astam komanda qatysty, dep habarlaıdy QazAqparat tilshisi.
Baspasóz qyzmetiniń aqparatyna sáıkes, oblystyq polıtsııa departamentiniń, qalalyq jáne aýdandyq ishki ister bólinisteriniń, ishki ásker men Memlekettik kúzet qyzmeti basqarmasynyń qyzmetkerleri ózara mergenderdi anyqtaǵan baıqaý birneshe nomınatsııa boıynsha ótkizildi.
«Mergender jarysy bizde jyl saıyn uıymdastyrylady. Ár top quramyndaǵy eki er adam men bir áıel adam ereje boıynsha polıtseılerdiń tabeldik qarýy Makarov tapanshasynan jáne Kalashnıkov avtomatynan saıysqa tústi. Búgingi jarysta Makarov tapanshasynan nysana kózdeýde erler arasynda polıtsııa maıory Raýan Abbasov úzdik nátıje kórsetse, Kalashnıkov avtomatynan atýda ishki ásker qyzmetshisi maıor Nurlan Súgiralıevke teń keletin mergen bolmady. Áıelder arasynda tapanshamen nysana kózdeýde Dınara Baýbekova men Merýert Marıakova qatysýshylardan ozyp shyqty. Almaty oblysy Memlekettik kúzet qyzmeti basqarmasynyń toby jalpy esepte joǵary nátıje kórsetip, úzdik top atandy», - dedi oblystyq ІІD Arnaıy daıarlyq basqarmasynyń bastyǵy Madııar Qusaıynov atap ótti.
Uıymdastyrýshylardyń habarlaýynsha, polıtsııa qyzmetkerleriniń tabeldik qarýmen atý, nysanaǵa dál tıgizý daǵdylaryn shyńdaý - arnaıy daıarlyq baǵyttarynyń biri. Oblys deńgeıindegi jarysta úzdik nátıje kórsetken mergender respýblıkalyq baıqaýda Jetisý óńiriniń namysyn qorǵaıtyn bolady.
