Taldyqorǵanda sýretshilerdiń halyqaralyq pleneri bastaldy

TALDYQORǴAN.QazAqparat - Almaty oblysynda shet elden jáne respýblıkanyń túkpir-túkpirinen jınalǵan sýretshilerdiń pleneri bastaldy. Aýqymdy shara Qazaqstannyń halyq sýretshisi Aısha Ǵalymbaevanyń 100 jyldyq mereıtoıyna oraı uıymdastyryldy, dep habarlaıdy QazAqparat tilshisi.

Bıyl QR Sh.Ýálıhanov atyndaǵy Memlekettik syılyǵynyń laýreaty, «Qurmet belgisi», «Eńbek Qyzyl tý» ordenderiniń ıegeri, esimi Respýblıkanyń qurmetti Altyn kitabyna jazylǵan, Qazaqstan ónerin damytýǵa qosqany úlesi úshin «Tarlan» syılyǵyn alǵan Aısha Ǵalymbaevanyń týǵanyna - 100 jyl. «Týǵan jerim - tuǵyrym» halyqaralyq kásipqoı sýretshilerdiń pleneri osy mereıtoı qarsańynda «Rýhanı jańǵyrý» baǵdarlamasy aıasynda uıymdastyrylyp otyr.

Sharanyń negizgi bóligi Tekeli qalasynda ótedi. Sýretshiler 10 kún boıy Jetisý jeriniń ásem tabıǵatynda shyǵarmashylyqtaryn shyńdaıdy. Ózara tájirıbe almasyp, kúzdiń ásem boıaýlaryn beıneleıtin bolady. Plenerge Qyrǵyzstan men Qytaıdan jáne Astana, Almaty, Pavlodar qalalary men Batys Qazaqstan oblysynan sýretshiler kelgen. Almaty oblysynyń qylqalam sheberleri de sharadan shet qalmaq emes.Plenerdiń jabylý saltanaty 18 qazan, saǵat 11:00-de Taldyqorǵan qalasyndaǵy «Oqýshylar saraıynda» ótedi. Qylqalam sheberleri osy kúnder aralyǵynda salǵan sýretterin Almaty oblysy «Kórkemóner galereıasynyń» qoryna tabystaıdy. Jetisýdyń ásem tabıǵatyn on kúnge jýyq beınelegen qylqalam sheberleriniń jumys barysynan beınerolıkter jasalyp, týyndylarynan uıymdastyrylǵan kórme de kópshilik nazaryna dál osy kúni usynylatyn bolady.