Taldyqorǵanda sýǵa aqqan qyz 5 kúnnen beri tabylmaı jatyr
TALDYQORǴAN.QazAqparat - Taldyqorǵanda 5 kún buryn sýǵa aǵyp ketken 2004 jylǵy Aınagúl Sqaqbaı Nurjanqyzyn izdeý jumystary jalǵasýda. Qazir jasóspirimdi izdeýge 300-ge jýyq adam jumyldyrylǵan, dep habarlaıdy QazAqparat tilshisi.
«Іzdeý jumystaryna TJD jeke quramynan 120 adam jumyldyryldy. Oǵan qosa eriktiler men áskerıler barlyǵy 300-ge jýyq adam qyz balany izdestirip jatyr. Olar Qaratal ózeniniń arnasyn buryp izdedi. Ózenniń 62 shaqyrym jaǵalaýy tolyqtaı tekserildi. Súńgýirler de izdeý jumystaryn qarqyndy júrgizip jatyr. Biraq ázirge qyz bala tabylmady», - dedi Almaty oblystyq TJD baspasóz qyzmetiniń ókili Azamat Jurtbaev.
Aıta keteıik, 5 shilde kúni 14 jastaǵy Aınagúl Qaratal ózenine aǵyp ketken. Oqıǵaǵa onyń 7 jáne 11 jastaǵy týystary kýá bolǵan.
