Taldyqorǵanda stýdentterdiń jataqhanaǵa ornalasý máselesi sheshiletin boldy
TALDYQORǴAN. QazAqparat - Taldyqorǵan qalasyndaǵy kolledjder men joǵary oqý oryndary stýdentteriniń jataqhanaǵa qatysty máselesi sheshiletin boldy. Bul týraly búgin oqý oryndaryn aralaǵan Almaty oblysy ákiminiń orynbasary Jaqsylyq Omar málim etti, dep habarlaıdy QazAqparat tilshisi.
Aıta keterligi, Almaty oblysy ákiminiń orynbasary Jaqsylyq Omar osydan biraz ýaqyt buryn bilim mekemelerin aralap, jataqhanalardaǵy stýdentterdiń jaı-kúıimen tanysqan edi. Onda stýdentter baspanasynda sol oqý orynynda jumys isteıtin mamandardyń turyp jatqanyn kórip, óz pikirin bildirgen.
«Otbasyly adamdar turǵan jerde tynyshtyq bola bermeıdi. Balalardyń sabaqqa daıyndalyp, bos ýaqyttarynda ártúrli shara uıymdastyrýy úshin jataqhana stýdentterdiń óz enshilerinde bolýy tıis. Onda demalys orny, kitap oqıtyn bólme bolýy tıis», - dep eskertý jasaǵan.
Búgingi tekseris barysynda da oblys ákiminiń orynbasary stýdentterdiń zamanaýı bilim alyp, tynyǵyp, bos ýaqytyn tıimdi ótkizýine basa kóńil bóldi.
«Otbasyly adamdar turatyn jataqhanaǵa syrttan bóten adamdardyń keletini aıdan anyq. Ondaı jerde ishimdik ishilýi ábden múmkin. Biz jasóspirim ul-qyzdardyń qaýipsizdigin saqtaýymyz kerek. Jastardy ádeptilikke úıretip, boıyn jaman ádetterden saqtaý úshin tárbıesine, alańsyz bilim alýyna basa kóńil aýdaramyz. Sondyqtan, bilim oshaqtarynyń jataqhanasynda turyp jatqan 360 adam kóktem shyǵysymen jataqhanalardan shyǵarylatyn bolsyn. Onda stýdentter turady. Baspanasyz mamandardyń máselesin sheshýdiń basqa joldaryn qarastyrýymyz kerek», - dedi ákim orynbasary.
Sonymen qatar, Jaqsylyq Omar bilim berý mekemelerin aralaý barysynda Taldyqorǵan qalasyndaǵy servıs jáne tehnologııa kolledjiniń maman daıarlaýdaǵy ádisin jan-jaqty qadaǵalaıtynyn jetkizdi.
«Maman tárbıeleýde ýaqytty tıimdi paıdalanyp, oqytý baǵdarlamasy aıasynda jastardy birneshe kásiptik mamandyqqa baýlý, suranysqa ıe salalar boıynsha oqytý bilim mekemeleriniń jaýapty qyzmetkerleriniń nazarynan túspeý tıis», - dedi ol.
