Taldyqorǵanda stýdentterdiń atynan 24 mln teńge nesıe alǵan komendant sottaldy

TALDYQORǴAN. QazAqparat - Jetisý oblysy Taldyqorǵan qalalyq soty birneshe ret jasalǵan alaıaqtyq jasap, stýdentterdiń atynan nesıe rásimdegen komendant S-ǵa qatysty qylmystyq isti qarady. Protsess QK 190-babynyń 3-bóligi 4-tarmaǵynda kózdelgen is aıasynda ótti, dep habarlaıdy QazAqparat.

Sottalýshy S. joǵarǵy oqý ornyna qarasty jataqhananyń komendanty qyzmetin atqara júrip, 2021-2022 jyldar aralyǵynda stýdentter men jataqhana qyzmetkerleriniń senimine kirip, alaıaqtyq jolmen ınternet-bankıng qyzmeti arqyly taýarly jáne aqshalaı nesıe resimdegen.

Bas-aıaǵy 16 jábirlenýshige jalpy kólemi 24 mıllıonnan astam somada materıaldyq shyǵyn kelgen.

Sottalýshy S. 2021 jyldyń qazan aıynda jábirlenýshi D. ózine senim artatynyn bile otyryp, qujattaryn jumys babymen degen jeleýmen suratqan.

Jábirlenýshiniń jeke basyn kýálándyratyn qujattardy alǵan soń, S. mıkroqarjylyq uıymnan 600 myń teńgege jýyq taýarly kredıtti jasyryn resimdep, taýardy satyp, óz paıdasyna jaratqan.

Budan soń S. jábirlenýshini D-ny tolyq jaýyp tastaımyn dep aldap, mıkroqarjylyq uıymnan 560 myń teńge nesıe aldyrtqan.

Qolynda D-nyń jeke bas málimetteriniń paıdalanǵan sottalýshy, ártúrli mıkroqarjylyq uıymdardan jasyryn túrde qosymsha baılanys retinde óziniń uıaly nómirin kórsete otyryp, D-nyń atynan mıkronesıeler alyp, jalpy 2 mln teńgeden astam shyǵyn keltirgen.

Budan bólek, sottalýshy S. osyǵan uqsas jaǵdaılarda jáne ártúrli jeleýmen 15 stýdent pen jataqhana qyzmetkerlerine alaıaqtyq jasap, 22 mln teńgeden astam shyǵynǵa ushyratqan.

Sot jaryssózinde prokýror sottalýshy S-ny kináli dep tanyp, oǵan 4 jyl merzimge bas bostandyǵyn shekteý jazasyn taǵaıyndap, búkil merzimge probatsııalyq baqylaý ornatýdy surady.

Sottalýshy S. taǵylǵan aıypty moıyndap, shyn nıetpen ókinip, ózine bas bostandyǵynan aıyrmaıtyn jaza taǵaıyndaýdy surady.

Jábirlenýshiler sottalýshyny keshirdi.

QK 190-baby 3-bóliginiń 4-tarmaǵynyń sanktsııasynda – múlki tárkilenip, belgili bir laýazymdardy atqarý nemese belgili bir qyzmetpen aınalysý quqyǵynan alty jylǵa deıingi merzimge aıyra otyryp nemese onsyz, úsh jyldan jeti jylǵa deıingi merzimge bas bostandyǵyn shekteý ne sol merzimge bas bostandyǵynan aıyrý kózdelgen.

Sot úkimimen S. kináli dep tanylyp, 4 jyl merzimge bas bostandyǵyn shekteý jazasy taǵaıyndaldy, sol aralyqta ol probatsııalyq baqylaýda bolady.

Sot úkimi zańdy kúshine engen joq.

Eske sala keteıik, biz byltyr stýdentterdiń atynan nesıe alǵan komendant ustalǵanyn habarlaǵan edik.