Taldyqorǵanda stýdent jastardyń respýblıkalyq festıvali ótti
TALDYQORǴAN.QazAqparat - Taldyqorǵan qalasynda alǵash ret Astana qalasynyń 20 jyldyǵyna arnalǵan «Eńseli Elordam - rýhanı keń ordam» atty stýdent jastardyń respýblıkalyq festıvali ótti. Іlııas Jansúgirov atyndaǵy Jetisý memlekettik ýnıversıtetiniń uıymdastyrýymen ótken merekelik sharaǵa Qazaqstannyń 15 joǵary oqý oryndarynan 50-den astam stýdent qatysty, dep habarlaıdy QazAqparat tilshisi.
Saıys eki baǵyt boıynsha júrgizildi. Birinshisinde patrıottyq án baıqaýy ótkizilse, ekinshisi Bıken Rımova atyndaǵy drama teatrda qoǵamdyq mańyzy bar zaman derti taqyrybyndaǵy qoıylymdar tamashalandy. Sharanyń negizgi maqsaty stýdent jastardyń dostyq, syılastyq qarym - qatynasyn qalyptastyrý, oqý oryndary arasyndaǵy ónerge baılanysty tájirıbe almasý bolyp tabylady.
Alǵashqy án baıqaýy ýnıversıtettiń bas oqý ǵımaratynda boldy. Qazylar alqasy bilimgerlerdiń ónerlerine laıyqty baǵasyn berdi. Otanǵa, elge, halyqqa degen súıispenshiligin án arqyly jetkizgen jastar jınalǵan jurttyń qurmetine bólendi.
Oblystyq drama teatrda festıval sharttary boıynsha teatrlandyrylǵan qoıylymdar qoıyldy. Sahna tórine shyqqan Taraz ınnovatsııalyq - gýmanıtarlyq ýnıversıtetiniń stýdentteri «Jesirler» atty kórinisti usyndy. S. Amanjolov atyndaǵy Shyǵys Qazaqstan memlekettik ýnıversıetiniń «Shabyt» stýdentter teatry ózderi daıarlaǵan «Kókperdeniń kerdeńi» atty qoıylymdy kópshilik nazaryna tartý etti. І.Jansúgirov atyndaǵy Jetisý memlekettik ýnıversıteti «Jas túlek» teatrynyń «Adasqandar» qoıylymy jınalǵan qaýymǵa jaqsy áser qaldyrdy.
Baıqaý sońynda ýnıversıtet rektory Qýat Baımyrzaev jeńimpazdarǵa marapattaý qaǵazdaryn tapsyrdy.
«Teatrlandyrylǵan kórinis» boıynsha І dárejeli dıplomdy Jetisý Memlekettik ýnıversıtetiniń «Jas túlek» stýdenttik teatry jeńip aldy. «Patrıottyq ánder» baıqaýy boıynsha Bas júldege Shyǵys Qazaqstan memlekettik ýnıversıtetiniń stýdenti - Dıana Myrza qol jetkizdi.
