Taldyqorǵanda sóndirilmegen temekiden shyqqan órtten 43 adam evakýatsııalandy

TALDYQORǴAN. QazAqparat - Taldyqorǵanda kópqabatty úıden shyqqan órt kezinde 6 adam qutqaryldy, dep habarlaıdy QazAqparat Tótenshe jaǵdaılar mınıstrligine silteme jasap.

4 qazan kúni saǵat 16:54-te Almaty oblysynyń TJD-ne Samal shaǵynaýdanyndaǵy páterlerdiń birinde órt shyqqany týraly habarlama kelip tústi.

Atalǵan shaqyrtý ornyna joǵary dárejeli shaqyrtý boıynsha kúshter men quraldar, atap aıtqanda Taldyqorǵan qalasynyń órt sóndirý bólimsheleri dereý jiberildi.

Órt sóndirýshiler oqıǵa ornyna belgilengen normatıvtik ýaqytta kelip jetti.

Kelgen boıda tútindelgen páterlerden adamdardy qutqarý jáne evakýatsııalaý jumystary kajet ekeni anyqtaldy.

Órtti bir mezgilde sóndire otyryp, adamdardy qutqarý jáne evakýatsııalaý boıynsha jumystar dereý uıymdastyryldy.

Qabyldanǵan jedel sharalarmen 6 adam qutqaryldy, onyń ishinde 3 bala, sondaı-aq 43 adam, onyń ishinde 17 bala evakýatsııalandy jáne 52 adam óz betinshe syrtqa shyqqan.

Órttiń ǵımarat tóbesine jáne kórshi páterlerge taralýyna jol berilgen joq.

Oqıǵa ornynda Almaty oblysy TJD 33 qyzmetkeri men 10 tehnıkasy, sondaı-aq polıtsııa, jedel medıtsınalyq kómek jáne avarııalyq-gaz qyzmetiniń qyzmetkerleri jumys istedi.

Órt saǵat 17:19-da aýyzdyqtalyp, saǵat 17:33-te 21 sharshy metr alańda sóndirildi, zardap shekkender men qurban bolǵandar joq.

Órttiń aldyn ala sebebi - bógde kalorııasy az ot kózi (sóndirilmegen temeki) boldy.

Almaty oblysynyń TJD azamattardy turmysta órt qaýipsizdigi erejelerin saqtaýǵa shaqyrady.