Taldyqorǵanda sharýalar egin alqaptaryn sýaratyn sý tappaı dabyl qaǵýda
TALDYQORǴAN. QazAqparat - Taldyqorǵanda ondaǵan sharýa bir aıdan beri alqaptaryna bir tamshy sý tımedi dep dabyl qaǵýda. Aıtýlarynsha, qant qyzylshasy, soıa, dándi daqyl - barlyǵy 6 myń gektar egis kúnge kúıip, jelge qaǵylyp, qatalap tur, dep habarlaıdy QazAqparat tilshisi.
96 gektarǵa qant qyzylshasyn sepken Shambulaı Óskenbaev eńbegimiz dalaǵa ketetin boldy dep alańdaýly.
«Elbasy tapsyrmasyn júzege asyramyz dep qant qyzylshasyn ektik. Endi mine, bir aı boldy, sý joq. Prezıdent, Almaty oblysynyń ákimi sý máselesin sheship bersin dep suraımyz. Alǵan nesıemizdi qalaı tóleımiz? Ónim almasaq, shyǵynǵa shash etekten batqaly turmyz», - dedi Shambulaı Óskenbaev.
Shambulaı aqsaqal syndy basqa sharýarlar da 6 myń gektar ónim kúnge kúıip, qatalap jatqanyn Tekelidegi sý elektr stantsııasynan kóredi. Sol jerge barlyq sý jınalyp, egistikke tirshilik nári jiberilmeı otyr degen oımen olar stansaǵa da bardy. Biraq mamandar sý elektr stantsııasynan egistikke eshqandaı kedergi joq dep sendirdi.
«Qaratal ózeninde sý azaıyp ketken. GES-ke bardyq. Buryn ol jerde 50 tekshe metr sý bolsa, qazir 12-13 tekshe metr ǵana sý jatyr. Sharýalarmen kelisip jatyrmyz, 4 kún - Taldyqorǵanǵa, 4 kún - Eskeldige sý bereıik dep otyrmyz. Bar sýdy únemdep qoldanýǵa tyrysamyz», -deıdi «Qazsýshar» RMK Almaty fılıaly dırektorynyń mindetin atqarýshy Saıat Qudaıbergenov.
Mamandar osylaısha sý tapshylyǵy jyldan jylǵa kúrdelenýi múmkin degen boljam aıtady. Sondyqtan tirshilik nárine talaspaı, uqypty paıdalaný qajet.
